جەلىدە تۇركىستان وبلىسى، ماقتاارال اۋدانىنداعى مەكتەپتەردىڭ بىرىندە وقۋشىلارعا ۇلتتىق كيىمدەرىن شەشكىزىپ، قىسىم كورسەتكەن مۇعالىمنىڭ ۆيدەوسى تارادى، دەپ حابارلايدى "ادىرنا" ۇلتتىق پورتالى Egov.press تەلەگرام ارناسىنا سىلتەپ.
ۆيدەودا وقۋشى قىز ەڭكىلدەپ جىلاپ، مۇعالىمىنىڭ سىنىپتاستارىنىڭ كوزىنشە بۋللينگ جاساعانىن ايتادى:
"جاڭا داپتەر باستا دەيدى ەكەن كۇندە. كەشە عانا باستادىم عوي، قايتا-قايتا ارناي بەرەمىن بە دەسە، "مىنا قىزدىڭ داپتەرگە اقشاسى جوق ەكەن، ءبارى جابىلىپ اقشا جيناپ بەرىڭدەر" دەپ تومەندەتەدى ەكەن" دەيدى ۆيدەو تۇسىرگەن ۇستاز.
ول مۇعالىمگە وقۋشىلاردىڭ ۇلتتىق كيىمىنە تيىسپەۋىن سۇراپ، كيكىلجىڭ شىعارماۋدى وتىنەدى.
ءبىلىم مينيسترلىگى قازىر بۇل فاكتى بويىنشا جاعدايدى جان-جاقتى زەردەلەۋ ءۇشىن تۇركىستان وبلىسىنىڭ ءبىلىم باسقارماسى مەن ءبىلىم بەرۋ سالاسىنداعى ساپانى قامتاماسىز ەتۋ باسقارماسىنىڭ وكىلدەرىنەن تۇراتىن ارنايى كوميسسيا قۇرىلعانىن حابارلادى.
«تەكسەرۋ ناتيجەلەرى بويىنشا قازاقستان رەسپۋبليكاسىنىڭ قولدانىستاعى زاڭناماسى اياسىندا ءتيىستى شارالار قابىلداناتىن بولادى. مەكتەپ وقۋشىسى پەداگوگيكالىق پسيحولوگتاردان قاجەتتى پسيحولوگيالىق قولداۋ الدى. بۇل وقيعا قر ءبىلىم مينيسترلىگى مەن جەرگىلىكتى اتقارۋشى ورگانداردىڭ باقىلاۋىندا»، - دەپ ءتۇسىندىردى قر پارلامەنتى ءماجىلىسىنىڭ ءباسپاسوز حاتشىسى مەرەكە امانگەلدىقىزى.
جەلىدە تاراعان ۆيدەونىڭ استىنا پىكىر قالدىرۋشىلار بۋللينگ كورسەتۋشى مۇعالىمنىڭ سىرت كيىمىنە نارازىلىقتارىن جازدى.
"سىرت كيىممەن وتىرعانى نەسى؟ مۇعالىم ەمەس پە؟ شالبار كيىپ الىپتى ونىڭ ۇستىنە", "ناعىز قاجەتتى جاس كادرلاردى جۇمىسقا الۋ كەرەك، الجيىن دەگەن كىسىلەردى وتىرعىزىپ قويادى قازىر" دەيدى كوممەنت قالدىرۋشىلار.
