ەلىمىزدەگى كوروناۆيرۋسقا قاتىستى احۋالدىڭ كۇن ساناپ ناشارلانىپ بارا جاتقانى جۇرتتى الاڭداتا باستادى. بىرنەشە قالامىز قىزىل ايماققا ەندى. بۇل تۋرالى رەسمي بيلىك وكىلدەرى دە مالىمدەدى. سوعان قاراماستان قازاقستانداعى كەيبىر مەكتەپتەردە وقۋشىلار بارىپ-كەلىپ ءبىلىم الۋدا.
بالاسىنىڭ ساباق وقۋى ءۇشىن مەكتەپكە بارىپ كەلۋى كەز كەلگەن اتا-انا ءۇشىن ۇرەيگە اينالا باستادى. ويتكەنى ءدال قازىرگى كەزدە بالالار اراسىندا دا كوروناۆيرۋستەن بولەك باسقا دا جۇقپالى اۋرۋلاردىڭ تاراپ، ءورشيتىن كەزەڭى. الەۋمەتتىك جەلىلەردە دە ساقتىق شارالارى ءۇشىن وقۋشىلار قاشىقتىقتان ءبىلىم السىن دەپ تالاپ قويىپ جاتقاندار جەتەرلىك. ماسەلەن، Facebook-تاعى «قازاقستان ۇستازدارى» توبىندا:
«ەپيدەميولوگيالىق جاعدايدى ەسكەرىپ مەكتەپتەگى وقۋدى ونلاينعا كوشىرگەن دۇرىس دەپ ويلايمىن. بۇل - بارلىعىمىزدىڭ قاۋىپسىزدىگىمىز ءۇشىن ماڭىزدى. وسى جەردە دابىل قاعىپ، ماسەلەنى كوتەرىپ وتىرعان اتا-انالار مەن مۇعالىمدەردى قولدايمىن. ادام ءومىرى مەن دەنساۋلىعى بارىنەن قىمبات!» دەگەن جازباعا قاتىستى جۇرتشىلىق قولداۋ پىكىرىن جازىسۋدا.
«كوۆيد پە، باسقا ما، بىلمەيمىن، تاياۋدا عانا 4 جاسار ۇلىم تابان استىندا قىزۋى كوتەرىلىپ، مازاسى قاشتى. الگىندە عانا ويناپ وتىرعان ۇلىمنىڭ قىزۋى تۇسپەي، دەنەسىن قىزىل تۇيىرشىك بورتپەلەر باستى. شۇعىل دارىگەرگە قاراتتىق. سول كەزدە دارىگەرىمىز 10 جاسقا دەيىنگى بالالار اراسىندا وسىنداي جۇقپالى ۆيرۋس قاتتى ءجۇرىپ جاتقانىن ايتتى. ايتسا، ايتقانىنداي، كەلەسى كۇنى 9 جاسار قىزىما جابىستى الگى اۋرۋ. ءبىز ابىگەرگە ءتۇسىپ جاتقاندا، اۋىلداعى كەلىنىم دە 2 جاسار جانە 8 ايلىق بالالارىنىڭ وسىنداي اۋرۋمەن اۋىرىپ باستاعانىن ايتتى. دەمەك، مىناداي شاقتا بالانى مەكتەپكە جىبەرىپ، ابىروي تاپپايتىنىمىز انىق. سوڭعى توقساندى قاشىقتىقتان وقىتا سالعانىمىز دۇرىس»،- دەيدى شىمكەنتتىك اتا-انا تولقىناي باقىتبەكقىزى.
وسىعان دەيىن دە نەگىزگى توقسانداردى قاشىقتىقتان وقىتقان قازاقستان مەكتەپتەرىن سوڭعى 4-ءشى توقساندا اشۋدىڭ ماڭىزى قانشالىقتى سالماقتى؟ ەكى ايعا جەتەر-جەتپەس ۋاقىتتا مەكتەپكە بارىپ ءبىلىم الادى دەگەن بالالارىمىزدىڭ دەنساۋلىعىنا قاۋىپ تونسە، نە بولماق؟ الدە بۇل سۇراققا قاتىستى حالىق دەنساۋلىعىنا جاۋاپتى وكىلدەردىڭ ناقتى ايتارى بار ما ەكەن؟
مۇقاش مۇراتۇلى،
"ادىرنا" ۇلتتىق پورتالى.
