استانا قالاسىندا باستاۋىش سىنىپ مۇعالىمدەرىنە ارنالعان رەسپۋبليكالىق «التىن تۇعىر» ماتەماتيكالىق وليمپياداسى ءوز مارەسىنە جەتتى. بۇل ءبىلىم دوداسى 26–27 ناۋرىز كۇندەرى ەلورداداعى №115 مەكتەپ بازاسىندا ءوتتى.
وليمپيادانى «دارىن» رەسپۋبليكالىق عىلىمي-پراكتيكالىق ورتالىعى مەن «زەردەلى» اقىل-وي دامىتۋ مەكتەبى بىرلەسىپ ۇيىمداستىردى. جوبانىڭ باستى ماقساتى – باستاۋىش سىنىپ مۇعالىمدەرىنىڭ كاسىبي شەبەرلىگىن شىڭداۋ، پەداگوگ مارتەبەسىن كوتەرۋ جانە ءبىلىم ساپاسىن دامىتۋ.
بايقاۋدىڭ اۋقىمى جىل سايىن كەڭەيىپ كەلەدى. 2024–2025 وقۋ جىلى وليمپياداعا شامامەن 12 مىڭ مۇعالىم قاتىسسا، بيىل 2025–2026 وقۋ جىلىندا قاتىسۋشىلار سانى 19 مىڭنان اسىپ ءتۇستى. ىرىكتەۋ ناتيجەسىندە قازاقستاننىڭ 20 وڭىرىنەن كەلگەن ەڭ ۇزدىك 161 مۇعالىم رەسپۋبليكالىق فينالدا باس قوستى.
وليمپيادا تاپسىرمالارى باستاۋىش سىنىپ باعدارلاماسىنا نەگىزدەلگەن لوگيكالىق جانە اۆتورلىق ەسەپتەردەن تۇردى. قاتىسۋشىلارعا تاپسىرمالاردى ورىنداۋ ءۇشىن 120 مينۋت ۋاقىت بەرىلدى. نەگىزگى سايىس 26 ناۋرىزدا ءوتىپ، مۇعالىمدەر جەكە جانە كوماندالىق كەزەڭدەردە بىلىمدەرى مەن تاجىريبەسىن سىنادى، ەسەپتەردى تالدادى.
«زەردەلى» اقىل-وي دامىتۋ مەكتەبىنىڭ نەگىزىن قالاۋشى ءماۋىت ىرىسبەك ءماۋىتۇلى باستاۋىش ءبىلىمنىڭ ماڭىزىن ەرەكشە اتاپ ءوتتى:
ء«بىلىمنىڭ نەگىزى باستاۋىشتا. بالانىڭ تۇلعا رەتىندە قالىپتاساتىن كەزەڭى – باستاۋىش سىنىپ. سوندىقتان باستاۋىش مۇعالىمدەرىنىڭ ەڭبەگى ءاردايىم ماڭىزدى ءارى الدىڭعى ورىندا. ءبىز وسى وليمپيادانى ۇستازدارعا قۇرمەت كورسەتۋ جانە ولاردىڭ كاسىبي دامۋىنا قولداۋ ءبىلدىرۋ ماقساتىندا وتكىزىپ كەلەمىز»، – دەدى ول.
27 ناۋرىز كۇنى №115 مەكتەپتە وتكەن سالتاناتتى ماراپاتتاۋ راسىمىندە جەڭىمپازدار انىقتالىپ، ۇزدىك شىققان پەداگوگتارعا ارنايى ديپلومدار مەن قارجىلاي سىياقىلار تابىس ەتىلدى. بيىلعى دودانىڭ جالپى جۇلدە قورى 1,5 ميلليون تەڭگەنى قۇرادى.
ابسوليۋتتىك ءى ورىن ەكى قاتىسۋشىعا بۇيىردى. 100 مۇمكىن ۇپايدىڭ 84 ۇپايىن جيناعان:
-
باتىس قازاقستان وبلىسىنان ابۋەۆا گاليا ەركينگاليەۆنا،
-
جامبىل وبلىسىنان بايتيلەۋوۆا جانار لەسباەۆنا جەڭىمپاز اتاندى.
كوماندالىق جارىس قورىتىندىسى بويىنشا باس جۇلدەنى اقتوبە وبلىسى يەلەندى.
رەسپۋبليكالىق «التىن تۇعىر» ماتەماتيكالىق وليمپياداسى باستاۋىش مۇعالىمدەرىنىڭ جوعارى ناتيجەلەرگە جەتۋگە ۇمتىلىسىن جەتىلدىرۋگە، شىعارماشىلىق الەۋەتى مەن پەداگوگيكالىق شەبەرلىگىن دامىتۋعا جانە مۇعالىم ماماندىعىنىڭ مارتەبەسىن ارتتىرۋعا باعىتتالعان ماڭىزدى الاڭعا اينالىپ وتىر.
