جاڭا جىل قارساڭىندا شىرشانى بەزەندىرۋ كەزىندە بيىكتەن قۇلاپ، باسىنان اۋىر جاراقات العان سەمەيلىك مۇعالىم قۋات ايتقاليەۆتىڭ ءىسىن ەڭبەك ينسپەكتسياسى تەكسەرىپ بولدى. جۇمىس بەرۋشىنىڭ كىناسى 100% دالەلدەندى. بۇل تۋرالى ەڭبەك ينسپەكتسياسى مالىمەت تاراتتى، دەپ حابارلايدى “ادىرنا” ۇلتتىق پورتالى.
شەشىمگە ساي، جۇمىسقا بارماعان كۇندەرى ءۇشىن مۇعالىمگە ەڭبەكاقىسى تولىق كولەمدە تولەنەدى.
سەمەيدەگى №49 مەكتەپتە قازاق ءتىلى مەن ادەبيەتى پانىنەن بەرەتىن مۇعالىم اۋىر جاراقاتىنا بايلانىستى جاسالعان وتادان كەيىن جۋىردا عانا اۋرۋحانادان شىققان. دارىگەرلەر ناۋقاستىڭ باس سۇيەگىنىڭ جارتىسىن الىپ تاستاعان. ونىڭ ورنىنا ەكى ايدان كەيىن پلاستيك قويىلادى.
اتالعان فاكتىگە بايلانىستى قىلمىستىق كودەكستىڭ 362-بابى 4-تارماعى (بيلiكتi نەمەسە لاۋازىمدىق وكiلەتتiكتەردى اسىرا پايدالانۋ) بويىنشا قىلمىستىق ءىس اشىلعان.
ەندى جۇمىس بەرۋشى زارداپ شەككەن مۇعالىمگە ەم الىپ جاتقان كەزدەگى جالاقىسىن تولىق كولەمدە تولەۋگە مىندەتتەلەدى. سونىمەن قاتار اقىلى تۇردە جۇرگىزىلگەن ەمنىڭ بارلىق شىعىندارىن وتەيدى.
ەسكە سالايىق، جاڭا جىل مەرەكەسى قارساڭىندا شىرشا بەزەندىرۋگە زاڭسىز تارتىلعان 3 مۇعالىمنىڭ ءبىرى بيىكتەن قۇلاپ، زارداپ شەككەن ەدى. وسى وقيعادان كەيىن سەمەيدەگى ءبىلىم ءبولىمىنىڭ باستىعى قىزمەتىنەن قۋىلدى، ال ديرەكتورلار سوگىس الدى. مۇعالىمنىڭ ايەلى كۇيەۋىنىڭ مۇددەسىن قورعاپ، جۇمىسقا زاڭسىز شاقىرىلعانىن، ول ءۇشىن ەشقانداي اقى الماعانانىن ايتقان بولاتىن.
