Crocus City Hall ويىن-ساۋىق كەشەنىندە بولعان تەراكت سالدارىنان قازا تاپقاندار سانى 93 ادامعا جەتتى، - دەپ حابارلايدى “ادىرنا” ۇلتتىق پورتالى رەسەيدىڭ تەرگەۋ كوميتەتىنىڭ اقپاراتىنا سىلتەپ.
تاراعان اقپاراتقا سۇيەنسەك، تەرگەۋشىلەر، كريمينولوگتار مەن رەسەي تەرگەۋ كوميتەتىنىڭ ساراپشىلارىنان قۇرالعان تەرگەۋ توبى قىلمىستىق ءىستى زەرتتەۋدىڭ ەگجەي-تەگجەيلى جوسپارىنا سايكەس وقيعا ورنىندا جۇمىسىن جالعاستىرۋدا. توتەنشە جاعدايلار قىزمەتى ۇيىندىلەردى تازالاۋدا، بەينەباقىلاۋ كامەرالارىنىڭ جازبالارى زەرتتەلۋدە، زارداپ شەككەندەرمەن جۇمىس جۇرگىزىلىپ، كونتسەرت زالىنىڭ عيماراتىن تەكسەرۋ جانە زاتتاي ايعاقتاردى الۋ جالعاسۋدا.
"قازىرگى تاڭدا قازا تاپقاندار سانى 93 ادام ەكەنى انىقتالدى. قايتىس بولعاندار سانى بۇدان دا كوپ بولۋى مۇمكىن. الدىن الا مالىمەتتەر بويىنشا، ادامداردىڭ ولىمىنە وقتان جاراقاتتانۋ جانە جانۋ ونىمدەرىنەن ۋلانۋ سەبەپ بولعان", - دەلىنگەن حابارلامادا.
ماسكەۋ وبلىسىنىڭ دەنساۋلىق ساقتاۋ مينيسترلىگى كروكۋستاعى تەراكتىدەن كەيىن قازا تاپقانداردىڭ ءتىزىمىن جاريالادى. العاشقى 37 ادامنىڭ اتى-ءجونى انىقتالدى.
ەستەرىڭىزگە سالا كەتەيىك، 22 ناۋرىز كۇنى كەشكە رەسەيدىڭ كروكۋس سيتي حوللىندا بەلگىسىز بىرەۋلەر ءىرى تەراكت جاساعان بولاتىن. الدىن الا مالىمەت بويىنشا، ونداعان ادام قازا تاۋىپ، 100-دەن استامى جارالانعان. كروكۋس سيتي حوللداعى تەراكتىگە بايلانىستى قازاقستان ازاماتتارى ءۇشىن سەنىم تەلەفونى اشىلدى. پرەزيدەنت قاسىم-جومارت توقاەۆ قازاقستان اتىنان ماسكەۋدەگى كروكۋس سيتي حوللداعى لاڭكەستىك ارەكەتتى قاتاڭ ايىپتادى. ايتا كەتەيىك، ۋكراينا لاڭكەستىك ارەكەتكە قاتىسى جوقتىعىن بىردەن ءمالىم ەتتى.
