پاكىستاننىڭ بەلۋدجيستان پروۆينتسياسىندا بولعان لاڭكەستىك شابۋىلدار سالدارىنان 80-نەن استام ادام قازا تاپتى، دەپ حابارلايدى "ادىرنا" ۇلتتىق پورتالى Associated Press-كە سىلتەمە جاساپ.
اقپاراتقا سايكەس، سەنبى كۇنى سەپاراتيستىك «بەلۋدجيستان ازات ەتۋ ارمياسى» ۇيىمداستىرىلعان بىرنەشە شابۋىلعا جاۋاپكەرشىلىكتى ءوز موينىنا العان. جەرگىلىكتى بيلىكتىڭ مالىمەتىنشە، قازا تاپقانداردىڭ قاتارىندا 11 بەيبىت تۇرعىن، 10 قاۋىپسىزدىك قىزمەتكەرى جانە 67 شابۋىلداۋشى بار. سونىمەن قاتار قارۋلى توپ بىرنەشە بانكتى توناعان.
پروۆينتسيالىق ۇكىمەتتىڭ وكىلى شاحيد ريند شابۋىلداردىڭ باسىم بولىگى دەر كەزىندە توقتاتىلعانىن مالىمدەدى. ال بەلۋدجيستان ۇكىمەتىنىڭ باسشىسى سارفراز بۋگتي قاۋىپسىزدىك كۇشتەرى شابۋىلداۋشىلاردى قۋدالاپ جاتقانىن ايتتى.
بەلۋدجيستاننىڭ دەنساۋلىق ساقتاۋ ءمينيسترى باحت مۇحامماد كاكاردىڭ ايتۋىنشا، شابۋىلدار ءبىر مەزگىلدە باستالعان. لاڭكەستەر كۇزەت بەكەتتەرىنە، پوليتسيا كولىكتەرىنە، دولباندين قالاسىنداعى اكىمشىلىك نىساندارعا شابۋىل جاساعان. سونداي-اق تاسجولداردا اۆتوبۋس جولاۋشىلارىن كەپىلگە الۋعا ارەكەتتەنگەن.
ماستۋنگ وكرۋگىندە قارۋلى توپ تۇرمەگە شابۋىل جاساپ، 30 تۇتقىندى بوساتقان. ال نۋشكي وكرۋگىندەگى جاساق شتابىنا جاسالعان شابۋىل تويتارىلعان.
بيلىك مالىمەتىنشە، سوڭعى ەكى تاۋلىكتە بەلۋدجيستان پروۆينتسياسىندا 100-دەن استام سودىردىڭ كوزى جويىلعان. قازا تاپقاندار سانى ءالى ناقتىلانىپ جاتىر.
