اقش سوتى اۋعانستان ازاماتى موحامماد شاريفۋللانى 20 جىلعا باس بوستاندىعىنان ايىردى، دەپ حابارلايدى “ادىرنا”.
اقش دەرەگىنشە، ول «يسلام مەملەكەتى – حوراسان» (يگيل-ح، قازاقستاندا تىيىم سالىنعان ۇيىم) تەرروريستىك توبىنا شامامەن ون جىل بويى كومەكتەسكەن.
تەرگەۋ مالىمەتىنشە، شاريفۋللا سودىرلارعا اۆتومات كالاشنيكوۆپەن جۇمىس ىستەۋ جونىندە نۇسقاۋلىق بەرگەن جانە شابۋىل كەزىندە ولارمەن بايلانىستا بولعان. ول 2024 جىلعى 22 ناۋرىزدا ماسكەۋدەگى «كروكۋس سيتي حوللدا» جاسالعان شابۋىلعا قاتىسۋشىلارمەن بايلانىس ورناتقان.
سونىمەن قاتار، 2021 جىلى كابۋل اۋەجايىنىڭ Abbey Gate قاقپاسىندا بولعان جارىلىسقا دەيىن شاريفۋللا اۋەجايعا باراتىن جولدى بارلاپ، «تاليبان» باقىلاۋ بەكەتتەرىنىڭ جوق ەكەنىن توپ باسشىلىعىنا حابارلاعان. جارىلىستان 13 امەريكالىق اسكەري قىزمەتشى جانە شامامەن 160 بەيبىت تۇرعىن قازا تاپقان.
اقش ادىلەت مينيسترلىگىنىڭ مالىمەتىنشە، شاريفۋللا 2016–2025 جىلدار ارالىعىندا وننان استام تەرروريستىك شابۋىلعا قاتىسقان. ول بارلاۋ جۇمىستارىن جۇرگىزىپ، جانكەشتىلەردى تاسىمالداعان، قارۋ جەتكىزگەن جانە جارىلىستاردى تەرروريستىك ناسيحات ءۇشىن تۇسىرگەن.
شاريفۋللا 2025 جىلى ۇستالعان.
