ماسكەۋ تۇبىندەگى كراسنوگورسك قالاسىندا ورنالاسقان "كروكۋس سيتي حولل" كونتسەرت زالىندا بولعان تەراكتىدە 60-تان استام ادام قازا تاپتى، دەپ حابارلايدى “ادىرنا” ۇلتتىق پورتالى رەسەيدىڭ تەرگەۋ كوميتەتىنە سىلتەپ.
ۆەدومستۆونىڭ مالىمەتىنشە، كونتسەرت زالىندا تەرگەۋ امالدارى ءالى دە ءجۇرىپ جاتىر.
“قازا بولعاندار سانى 60-تان استى. قازا بولعاندار سانى ارتۋى مۇمكىن. 100-دەن استام ادام جاراقات العان” دەپ جازدى تەرگەۋ كوميتەتى.
ماسكەۋ وبلىسىنىڭ گۋبەرناتورى ۆوروبەۆ 115 زارداپ شەككەن ادامنىڭ اۋرۋحانادا جاتقانىن، ولاردىڭ 60-ىنىڭ جاعدايى اۋىر ەكەنىن ايتتى.
ال رەسەي پرەزيدەنتى ۆلاديمير پۋتين وسى وقيعاعا وراي ازىرگە مالىمدەمە جاريالامادى.
ەستەرىڭىزگە سالا كەتەيىك، 22 ناۋرىز كۇنى كەشكە رەسەيدىڭ كروكۋس سيتي حوللىندا بەلگىسىز بىرەۋلەر ءىرى تەراكت جاساعان بولاتىن. الدىن الا مالىمەت بويىنشا، ونداعان ادام قازا تاۋىپ، 100-دەن استامى جارالانعان. كروكۋس سيتي حوللداعى تەراكتىگە بايلانىستى قازاقستان ازاماتتارى ءۇشىن سەنىم تەلەفونى اشىلدى. پرەزيدەنت قاسىم-جومارت توقاەۆ قازاقستان اتىنان ماسكەۋدەگى كروكۋس سيتي حوللداعى لاڭكەستىك ارەكەتتى قاتاڭ ايىپتادى. ايتا كەتەيىك، ۋكراينا لاڭكەستىك ارەكەتكە قاتىسى جوقتىعىن بىردەن ءمالىم ەتتى.
