يراننىڭ رۋحاني كوسەمى اياتوللا ءالي حامەنەي ەلدەگى نارازىلىقتاردى كۇش قۇرىلىمدارى باسا الماعان جاعدايدا تەگەراننان قاشىپ كەتۋدى جوسپارلاپ وتىر. ول وزىمەن بىرگە 20 كومەكشىسى مەن وتباسىن ەرتىپ كەتپەك. بۇل تۋرالى The Times گازەتى ۇلىبريتانيا بارلاۋ قىزمەتىنىڭ دەرەكتەرىنە سىلتەمە جاساي وتىرىپ جازدى، دەپ حابارلايدى «ادىرنا» ءتىلشىسى.
«ۆ جوسپارى حامەنەي مەن ونىڭ ەڭ جاقىن ورتاسىنا، سونىڭ ىشىندە ۇلى ءارى ىقتيمال مۇراگەرى مودجتاباعا ارنالعان»، – دەلىنگەن حابارلامادا.
يزرايل بارلاۋ قىزمەتىنىڭ وكىلى بەني ءسابتيدىڭ پىكىرىنشە، اياتوللا ماسكەۋ قالاسىنا قاشۋى مۇمكىن، ويتكەنى ونىڭ باسقا باراتىن جەرى جوق.
سونداي-اق The Times بيلىكتەن قۋىلعان سيريانىڭ بۇرىنعى پرەزيدەنتى باشار اسادتىڭ رەسەيدەن باسپانا العانىن اتاپ ءوتتى. رەسەي پرەزيدەنتىنىڭ ءباسپاسوز حاتشىسى دميتري پەسكوۆ اسادتىڭ قىزمەتتەن كەتۋىن ونىڭ جەكە شەشىمى دەپ اتاعان ەدى. وتكەن جىلدىڭ سوڭىندا پەسكوۆ اسادتىڭ رەسەيدەگى جاعدايى مەن ونىڭ ۆلاديمير پۋتينمەن كەزدەسۋى تۋرالى سۇراققا: «بۇل ماسەلە بويىنشا ەشقانداي اقپارات بەرە المايمىز»، – دەپ جاۋاپ بەرگەن.
2013 جىلعى Reuters اگەنتتىگىنىڭ باعالاۋىنشا، حامەنەيعا تيەسىلى جىلجىمايتىن مۇلىك پەن كومپانيالاردى قوسا ەسەپتەگەندەگى جالپى اكتيۆ كولەمى 95 ملرد دوللارعا جەتەدى. گازەت دەرەگىنشە، حامەنەيعا جاقىن بىرقاتار جوعارى لاۋازىمدى تۇلعانىڭ، سونىڭ ىشىندە يران ۇلتتىق قاۋىپسىزدىك جوعارعى كەڭەسىنىڭ حاتشىسى ءالي ءلاريدجانيدىڭ تۋىستارى شەتەلدە – اقش، كانادا جانە دۋبايدا تۇرادى.
بارلاۋ ەسەبىندە اياتوللانىڭ وتكەن جىلعى يزرايلمەن بولعان 12 كۇندىك سوعىستان كەيىن «السىرەگەنى» ايتىلعان. ول سوڭعى كۇندەرى، سونىڭ ىشىندە نارازىلىقتار كەزىندە دە كوپشىلىك الدىنا سيرەك شىققان. قاقتىعىس كەزەڭىندە حامەنەي بۋنكەردە جاسىرىنعانى ايتىلادى.
ء«بىر جاعىنان ول – قاتتى يدەولوگيالىق ۇستانىمداعى تۇلعا، ەكىنشى جاعىنان – پراگماتيك. ۇزاق مەرزىمدى ماقسات ءۇشىن تاكتيكالىق ىمىراعا بارۋعا دايىن. ول بولاشاقتى ويلايدى»، – دەلىنگەن حابارلامادا.
اقش پرەزيدەنتى دونالد ترامپ يراندا باعانىڭ وسۋىنەن تۋىنداعان نارازىلىقتار كۇشپەن باسىلسا، ۆاشينگتون ارالاسۋعا دايىن ەكەنىن مالىمدەگەن. بۇعان جاۋاپ رەتىندە ۇلتتىق قاۋىپسىزدىك جوعارعى كەڭەسىنىڭ حاتشىسى لاريدجاني اقش-تىڭ يراننىڭ ىشكى ىستەرىنە ارالاسۋى «بۇكىل ءوڭىردىڭ تۇراقسىزدانۋىنا» جانە «امەريكانىڭ مۇددەلەرىنە نۇقسان كەلتىرۋگە» اكەلەتىنىن ەسكەرتكەن بولاتىن.
