ماسكەۋلىك ازامات ءوزىنىڭ ايەلى مەن بالاسىن ون التىنشى قاباتتىڭ تەرەزەسىنەن لاقتىرىپ جىبەرگەن، دەپ حابارلايدى "ادىرنا" ۇلتتىق پورتالى ستارحيت سايتىنا سىلتەپ.
وقيعا 25 تامىز كۇنى ماسكەۋدەگى «لەفورتوۆو پاركى» تۇرعىن ءۇي كەشەنىندە بولعان.
ايەلى مەن بالاسى سول جەردە كوز جۇمدى. قىلمىسكەر قاسكويلىك ىسىنەن كەيىن دە تەرەزەدەن ءتۇرلى بوقاۋىز سوزدەر ايتىپ، تىر جالاڭاش كۇيدە ۇيىندەگى زاتتارىن لاقتىرعان. وقيعا ورنىنا ءتارتىپ ساقشىلارى جەتكەن. باق ۇستالعان 39 جاستاعى ازاماتتىڭ رەسەي فەدەراتسياسىنىڭ ورتالىق بانكىنىڭ قىزمەتكەرى ەكەنىن ايتتى. ولار جۇبايىمەن ءۇش جىل نەكەدە بولعان.
«ول ۇزاق ۋاقىت بويى تەرەزەدە جالاڭاش تۇرىپ الىپ، زاتتارىن لاقتىردى. قازىر «لەفورتوۆو پاركى» تۇرعىن ءۇي كەشەنىنىڭ اۋلاسى قورشاۋعا الىندى. قىلمىستىق ءىس قوزعالدى، جاعداي پروكۋراتۋرانىڭ باقىلاۋىندا»، - دەدى دەرەككوز.
«كراسنوكازارمەننايا كوشەسىندەگى تۇرعىن ءۇيدىڭ تەرەزەلەرىنىڭ استىنان اۋىر جاراقاتتارى بار ايەل مەن جاس بالانىڭ مايىتتەرى تابىلدى. قۇقىق قورعاۋ ورگاندارىنىڭ جۇمىسىن لەفورتوۆو اۋدانارالىق پروكۋرورى زافار ماحمۋدوۆ ۇيلەستىرۋدە. پروكۋراتۋرا وقيعانىڭ بارلىق ءمان-جايىن انىقتاۋدى، سونداي-اق تەرگەۋگە دەيىنگى تەكسەرۋ بارىسىن جانە ونىڭ قورىتىندىسى بويىنشا قىلمىستىق ءىس قوزعاۋ تۋرالى شەشىمنىڭ قابىلدانۋىن باقىلايدى»، - دەپ جازدى ماسكەۋلىك دەپارتامەنت وكىلدەرى.
