رەسەيلىك باق پەن كەيبىر شەنەۋنىكتەر Crocus City Hall كونتسەرت زالىنداعى كونتسەرتكە كەلۋشىلەرگە جاسالعان قارۋلى شابۋىلدى تەراكت دەپ اتاي باستادى. اقش شابۋىلدى ايىپتاپ، رەسەيگە كوڭىل ايتتى. ۆۆس ارناسى وقيعا كۋاگەرلەرىنىڭ پىكىرىن جاريالاپ جاتىر.
رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا كونتسەرت زالىنداعى اتىستاردى «قاندى تەررورلىق شابۋىل» دەپ اتادى.
ادام قۇقىقتارى جونىندەگى ۋاكىل تاتيانا موسكالكوۆا ءوزىنىڭ Telegram-ارناسىندا تەراكت قۇرباندارىنا كوڭىل ايتاتىنىن جاريالادى.
بۇل رەتتە ماسكەۋ وبلىسىنىڭ گۋبەرناتورى اندرەي ۆوروبەۆ cاقتىقپەن سويلەپ، جالپى جاعدايدى سىرعاقتاتا سيپاتتاعان. «ادامداردى قۇتقارۋ ءۇشىن بارلىعى دەر كەزىندە جاسالىپ جاتىر. SOBR جۇمىس ىستەپ جاتىر. كروكۋستىڭ جانىندا 70-تەن استام جەدەل جاردەم بريگاداسى بار، دارىگەرلەر زارداپ شەككەندەردىڭ بارلىعىنا قاجەتتى كومەك كورسەتۋدە»، - دەلىنگەن ونىڭ Telegram-كانالىندا.
ماسكەۋ مەرى سەرگەي سوبيانين دە ءوز ارناسىندا Crocus City Hall ورتالىعىنداعى جان تۇرشىگەرلىك تراگەديا تۋرالى جازدى جانە دەمالىس كۇندەرى ەلوردادا ويىن-ساۋىق شارالارىنىڭ توقتاتىلاتىنىن حابارلادى.
فوتوگراف دەيۆ پريموۆ – شابۋىل كەزىندە Crocus City Hall ورتالىعىندا بولعان ادامداردىڭ ءبىرى.
ول Instagram جەلىسىندە كورگەنى تۋرالى: «ءبىز «پيكنيك» توبىنىڭ كونتسەرتىن كۇتىپ وتىرعانبىز، قوڭىر كيىم كيگەن ادامدار زالعا باسا-كوكتەپ كىرىپ، اۆتوماتپەن ادامدارعا وق جاۋدىردى. ءبىز جۇگىرە باستادىق، قاتتى سوققى بولدى. سالدەن سوڭ ءبارى دە ۇرەيلەنىپ، جەردە جاتتى»،-دەپ جازدى.
فوتوگراف ەۆاكۋاتسيانىڭ بەينەجازباسىن جاريالادى. وندا ادامداردىڭ سىرتقا شىعۋدىڭ جولدى ىزدەپ، قاراڭعى دالىزدەرمەن جۇرگەنى بايقالادى. پريموۆ ادامداردى ەشكىم قۇتقارماعانىن، ولار وزدەرى قاشۋعا ءماجبۇر بولعانىن اتاپ ءوتتى.
«اتىس بولىپ جاتىر، ادامدارعا كومەكتەسەتىن ەشكىم جوق. بارلىعى مۇمكىندىگىنشە باس ساۋعالاۋعا تىرىسىپ جاتىر. Crocus جانىپ جاتىر. ەگەر ءبىز باس ساۋعالاعاندا باسقا باعىتپەن كەتكەندە، ەسىكتى بۇزا الماي، ءدال قازىر وتقا ورانعان بولار ما ەدىك»، - دەدى ول جانىپ جاتقان كونتسەرت زالىنىڭ الدىندا تۇرىپ.
زالداعى كۋاگەرلەردىڭ اراسىندا ۆيتالي ەسىمدى ادام دا بولعان. ول بىلاي دەدى: «ءبىز اتىستى ەستىدىك، باسىندا نە بولىپ جاتقانىن بىلمەدىك. سوسىن لاڭكەستەردىڭ ادامدارعا وق اتقانىن كوردىم. ولار بىرنەشە مولوتوۆ كوكتەيلىن لاقتىرىپ، ءبارى ورتەنىپ كەتتى. ءبىزدى شىعاتىن ەسىككە بارعاندا ونىڭ قۇلىپتاۋلى تۇرعانىن كورىپ، سودان كەيىن ءبىز جەرتولەگە كىرىپ، سول جەردە كومەك كۇتتىك»،- دەيدى ۆيتالي.
اتى-ءجونىن اتاماعان تاعى ءبىر كۋاگەر عيماراتتا بالالارىمەن بىرگە بي بايقاۋىنا كەلگەن اتا-انالار بار ەكەنىن ايتتى. «جارىسقا بالالار مەن جاسوسپىرىمدەر قاتىسىپ جاتقان. ادامدار جۇگىرىپ كەلىپ، اتىس بولىپ جاتقانىن ايتتى. سول جەردە كوڭىل-كۇي بولدى، بالالار بي كيىمدەرىمەن جۇرگەن ەدى»، - دەيدى.
اقش اكىمشىلىگى Crocus City Hall-دا بولعان وقيعاعا بايلانىستى كوڭىل ايتتى. «ءبىز ءبارىمىز ماسكەۋدەن كەلگەن حابارلامالار مەن بەينەلەردى كوردىك... ءبىز قوسىمشا اقپارات الۋعا تىرىسامىز»، - دەدى اق ءۇيدىڭ ۇلتتىق قاۋىپسىزدىك بويىنششا وكىلى دجون كيربي بريفينگتە.
«ءبىز جانىمىزبەن شابۋىل قۇرباندارىمەن بىرگەمىز»، - دەپ قوستى كيربي.
22 ناۋرىز كۇنى كەشكە ماسكەۋ تۇبىندەگى Crocus City Hall كونتسەرت زالىندا بەلگىسىز ادامداردىڭ ارالاسۋىمەن اتىس بولعان. بەيرەسمي مالىمەتتەرگە قاراعاندا اتىستان كەم دەگەندە 40 ادام قازا تاۋىپ، جۇزدەگەن ادام جارالانۋى مۇمكىن.
