قر باس اسكەري پروكۋرورىنىڭ ورىنباسارى دارحان ەرجانوۆ ارىس قالاسىنداعى جارىلىسقا قاتىستى قوزعالعان قىلمىستىق ءىس ۇزاق تەرگەلۋى مۇمكىن ەكەنىن ايتتى، دەپ حابارلايدى "ادىرنا" ۇلتتىق پورتالى Sputnik قازاقستان -عا سىلتەمە جاساپ.
ول ارىس قالاسىندا ورنالاسقان توتەنشە جاعدايعا قاتىستى قر قىلمىستىق كودەكسىنىڭ 462-بابى 3-بولىگى بويىنشا سوتقا دەيىنگى تەرگەپ-تەكسەرۋ امالدارى ءجۇرىپ جاتقانىن اتاپ ءوتتى.
"قارۋ-جاراقپەن، وق-دارiمەن نەمەسە قاۋىپ توندىرەتىن وزگە دە زاتتارمەن جۇمىس ىستەۋ ەرەجەلەرىن بۇزىپ، بۇل ابايسىزدا ەكi نەمەسە ودان دا كوپ ادامنىڭ ولiمiنە اكەپ سوققان جاعدايدا – كۇدىكتىنى بەس جىلدان ون جىلعا دەيiنگi مەرزiمگە باس بوستاندىعىنان ايىرۋ جازاسى كوزدەلگەن", - دەدى دارحان ەرجانوۆ.
باس اسكەري پروكۋروردىڭ ورىنباسارى قىلمىستىق ءىستى تەرگەۋ ءۇشىن ىشكى ىستەر مينيسترلىگىنىڭ تاجىريبەلى قىزمەتكەرلەرى ەنگەن جەدەل-تەرگەۋ توبى قۇرىلعانىن جەتكىزدى.
"زاڭدىلىقتى قامتاماسىز ەتۋ، ازاماتتاردىڭ كونستيتۋتسيالىق قۇقىقتارىن ساقتاۋ، قىلمىستى تەز اشۋ، كىنالى تۇلعالاردى انىقتاۋ ماقساتىندا تەرگەۋگە اسكەري جانە جەرگىلىكتى پروكۋراتۋرالاردىڭ قىزمەتكەرلەرى قاتىسۋدا. قۇقىق قورعاۋ ورگاندارىنىڭ قىزمەتىن ۇيلەستىرۋ ءۇشىن مۇددەلى ۆەدومستۆولارمەن بىرلەسە وتىرىپ تەرگەپ-تەكسەرۋ جوسپارى ازىرلەندى", - دەدى ول.
ونىڭ ايتۋىنشا، تەرگەۋدىڭ باستاپقى كەزەڭىندە جاعدايدىڭ ءمان-جايىن انىقتاۋعا، ادام ولىمىنە نە سەبەپ بولعانىنا باسا نازار اۋدارىلادى.
"وقيعا ورنى تەكسەرىلىپ، ىسكە قاتىسى بار قۇجاتتاردى الىنىپ جاتىر. كەلتىرىلگەن زالال انىقتالۋدا. قازىرگى كەزدە 100-دەن اسا ادامنان جاۋاپ الىندى. سونىمەن قاتار، بولجامدى نۇسقالار، ولاردىڭ اراسىندا ءورت قاۋىپسىزدىگىن ساقتاماۋ، لاۋازىمدى تۇلعالاردىڭ سالعىرتتىعى جانە تاعى باسقا سەبەپتەر قارالىپ جاتىر", - دەدى دارحان ەرجانوۆ.
باس اسكەري پروكۋروردىڭ ورىنباسارىنىڭ پىكىرىنشە، مۇنىڭ ءبارى تەكسەرىلەتىن بولادى. وق-ءدارى ساقتالاتىن قويمالاردىڭ قاۋىپسىزدىگىن قامتاماسىز ەتۋگە بولىنگەن بيۋدجەت قاراجاتى قانشالىقتى دۇرىس پايدالانىلعانى دا قارالادى. ەرجانوۆ جارىلعىش زاتتاردىڭ دۇرىس جينالۋى، قويمالاردا انىقتالعان كەمشىلىكتەردىڭ ۋاقتىلى جويىلعان-جويىلماعانىنا قاتىستى اسكەري قىزمەتشىلەردىڭ ارەكەتى تەكسەرىلەتىنىن ايتتى.
"تەرگەۋ ناتيجەسىندە جاۋاپتى تۇلعالاردىڭ ءىس-ارەكەتتەرىنە قۇقىقتىق باعا بەرىلەدى. تەرگەپ-تەكسەرۋ بارىسى باس پروكۋروردىڭ باقىلاۋىندا", - دەدى ول.
ءسوز سوڭىندا دارحان ەرجانوۆ قىلمىستىق ءىستى تەرگەۋ ۇزاققا سوزىلۋى مۇمكىن ەكەنىن ايتتى.
"قىلمىستىق پروتسەسسۋالدىق كودەكسكە سايكەس، قىلمىستىق ءىس 2 اي تەرگەلەدى. ەگەر 2 ايدا ءتيىستى ايعاقتار جينالماسا، ءىستى تەرگەۋ ۋاقىتى سوزىلادى. ءتىپتى، 3-5 ايعا دەيىن جەتۋى مۇمكىن. بۇل وتە كۇردەلى قىلمىستىق ءىس. تەرگەۋ جۇرگىزىلىپ جاتىر. كوپ جۇمىس ىستەۋ كەرەك", - دەپ تۇيىندەدى ءسوزىن باس اسكەري پروكۋروردىڭ ورىنباسارى.
ارىستاعى توتەنشە جاعداي
24 ماۋسىمدا تۇركىستان وبلىسىنداعى ارىس قالاسىندا جارىلىس بولدى. قالا جانىنداعى اسكەري ءبولىمنىڭ قويماسىندا ءورت شىعىپ، وق-ءدارى جارىلا باستاعان.
جەرگىلىكتى تۇرعىنداردىڭ ۇرەيى ۇشىپ، ۇيلەرىن تاستاپ قاشا باستادى. حالىقتى شىمكەنت جانە باسقا كورشىلەس ەلدى مەكەندەرگە ەۆاكۋاتسيالاۋ باستالدى.
جارىلىس سالدارىنان ءۇش ادام قازا تاپتى: ءبىر تۇرعىن جانە ەكى اسكەري قىزمەتكەر.
توتەنشە جاعداي سالدارىنان كەلگەن شىعىن مولشەرى 20 ميلليارد تەڭگە شاماسىندا دەپ بولجانىپ وتىر.
