QR Bas áskerı prokýrorynyń orynbasary Darhan Erjanov Arys qalasyndaǵy jarylysqa qatysty qozǵalǵan qylmystyq is uzaq tergelýi múmkin ekenin aıtty, dep habarlaıdy "Adyrna" ulttyq portaly Sputnik Qazaqstan -ǵa silteme jasap.
Ol Arys qalasynda ornalasqan tótenshe jaǵdaıǵa qatysty QR qylmystyq kodeksiniń 462-baby 3-bóligi boıynsha sotqa deıingi tergep-tekserý amaldary júrip jatqanyn atap ótti.
"Qarý-jaraqpen, oq-dárimen nemese qaýip tóndiretin ózge de zattarmen jumys isteý erejelerin buzyp, bul abaısyzda eki nemese odan da kóp adamnyń ólimine ákep soqqan jaǵdaıda – kúdiktini bes jyldan on jylǵa deıingi merzimge bas bostandyǵynan aıyrý jazasy kózdelgen", - dedi Darhan Erjanov.
Bas áskerı prokýrordyń orynbasary qylmystyq isti tergeý úshin ishki ister mınıstrliginiń tájirıbeli qyzmetkerleri engen jedel-tergeý toby qurylǵanyn jetkizdi.
"Zańdylyqty qamtamasyz etý, azamattardyń konstıtýııalyq quqyqtaryn saqtaý, qylmysty tez ashý, kináli tulǵalardy anyqtaý maqsatynda tergeýge áskerı jáne jergilikti prokýratýralardyń qyzmetkerleri qatysýda. Quqyq qorǵaý organdarynyń qyzmetin úılestirý úshin múddeli vedomstvolarmen birlese otyryp tergep-tekserý jospary ázirlendi", - dedi ol.
Onyń aıtýynsha, tergeýdiń bastapqy kezeńinde jaǵdaıdyń mán-jaıyn anyqtaýǵa, adam ólimine ne sebep bolǵanyna basa nazar aýdarylady.
"Oqıǵa orny tekserilip, iske qatysy bar qujattardy alynyp jatyr. Keltirilgen zalal anyqtalýda. Qazirgi kezde 100-den asa adamnan jaýap alyndy. Sonymen qatar, boljamdy nusqalar, olardyń arasynda órt qaýipsizdigin saqtamaý, laýazymdy tulǵalardyń salǵyrttyǵy jáne taǵy basqa sebepter qaralyp jatyr", - dedi Darhan Erjanov.
Bas áskerı prokýrordyń orynbasarynyń pikirinshe, munyń bári tekseriletin bolady. Oq-dári saqtalatyn qoımalardyń qaýipsizdigin qamtamasyz etýge bólingen bıýdjet qarajaty qanshalyqty durys paıdalanylǵany da qaralady. Erjanov jarylǵysh zattardyń durys jınalýy, qoımalarda anyqtalǵan kemshilikterdiń ýaqtyly joıylǵan-joıylmaǵanyna qatysty áskerı qyzmetshilerdiń áreketi tekseriletinin aıtty.
"Tergeý nátıjesinde jaýapty tulǵalardyń is-áreketterine quqyqtyq baǵa beriledi. Tergep-tekserý barysy Bas prokýrordyń baqylaýynda", - dedi ol.
Sóz sońynda Darhan Erjanov qylmystyq isti tergeý uzaqqa sozylýy múmkin ekenin aıtty.
"Qylmystyq proessýaldyq kodekske sáıkes, qylmystyq is 2 aı tergeledi. Eger 2 aıda tıisti aıǵaqtar jınalmasa, isti tergeý ýaqyty sozylady. Tipti, 3-5 aıǵa deıin jetýi múmkin. Bul óte kúrdeli qylmystyq is. Tergeý júrgizilip jatyr. Kóp jumys isteý kerek", - dep túıindedi sózin bas áskerı prokýrordyń orynbasary.
Arystaǵy tótenshe jaǵdaı
24 maýsymda Túrkistan oblysyndaǵy Arys qalasynda jarylys boldy. Qala janyndaǵy áskerı bólimniń qoımasynda órt shyǵyp, oq-dári jaryla bastaǵan.
Jergilikti turǵyndardyń úreıi ushyp, úılerin tastap qasha bastady. Halyqty Shymkent jáne basqa kórshiles eldi mekenderge evakýaııalaý bastaldy.
Jarylys saldarynan úsh adam qaza tapty: bir turǵyn jáne eki áskerı qyzmetker.
Tótenshe jaǵdaı saldarynan kelgen shyǵyn mólsheri 20 mıllıard teńge shamasynda dep boljanyp otyr.
