ناۋرىزناما تۇجىرىمداماسى اياسىندا 18 ناۋرىز – ۇلتتىق كيىم كۇنىنە وراي ورال قالاسىندا ۇلتتىق ۇلگىدەگى سىنىپتار شەرۋى ءوتتى. شاراعا ورال قالاسىنىڭ اكىمى ميرجان ساتقانوۆ، وبلىستىق قوعامدىق دامۋ باسقارماسىنىڭ باسشىسى گۇلجانا شوكەەۆا، وبلىستىق ءبىلىم باسققارماسىنىڭ باسشىسى ايگۇل مىڭباەۆا جانە قالا مەكتەپتەرىنەن 300-گە جۋىق وقۋشى قاتىستى.
قالا مەكتەپتەرىنىڭ وقۋشىلارى ناۋرىز ايىنىڭ العاشقى كۇنىنەن مەكتەپكە ۇلتتىق ۇلگىدەگى كيىممەن كەلۋدى باستادى. باستاۋىش بۋىن وقۋشىلارىنان باستاۋ العان باستامانى، باسقا دا وقۋشىلار قولداپ، ءار سىنىپ ءوز ەرەكشەلىكتەرىمەن مەكتەپ فورماسىن ۇلتتىق ۇلگىمەن ۇندەستىردى. ولاردىڭ بىرقاتارى ۇلتتىق كيىم كۇنىنە وراي وتكىزىلگەن شەرۋگە قاتىستى. ءار سىنىپتىڭ كيىم ۇلگىلەرى تانىستىرىلىپ، ادەبي مۋزىكالىق كومپوزيتسيا ارقىلى قىزداردىڭ بالالىق شاقتان، انا بولعانعا دەينگى كيەتىن باس كيىمدەرىنىڭ ەرەكشەلىكتەرى تۋرالى ءتۇسىندىرىلدى. سونىمەن قاتار جەرگىلىكتى ىسمەر-پەداگوگتەردىڭ قولىنان شىققان ۇلتتىق ناقىشتىڭ زاماناۋي كيىممەن ۇندەستىرىلگەن توپتامالارىنىڭ كورسەتىلىمى ۇسىنىلدى.
قالا اكىمى ميرجان ساتقانوۆ وبلىس باسشىسى اتىنان ناۋرىز مەيرامىمەن قۇتتىقتاپ، ۇلتتىق كيىمدى ۇلىقتاۋدى ەرتە جاستان بالالارعا ءتۇسىندىرىپ، ۇلتتىق قۇندىلىعىمىزدى دارىپتەۋ مەن كۇندەلىكتى كيۋگە ۇمتىلۋدىڭ وڭ باستاما ەكەنىن اتاپ ءوتتى.
– مەملەكەت باسشىسى قاسىم جومارت كەمەلۇلى كۇنى كەشە اتىراۋ تورىندە وتكەن ۇلتتىق قۇرىلتاي جيىنىندا «ۇلتتىق كيىم كۇنىن» ەنگىزۋدىڭ ماڭىزدىلىعىنا ايرىقشا باسىمدىق بەرىپ، «باسقا جۇرت قازاقتى كيىمىنەن تانيتىن بولۋى كەرەك. ءبىز باسقالارعا ەلىكتەۋشىلىكتەن، اسىرە-دىنشىلدىكتەن ساقتانىپ، سالت-داستۇرىمىزدەن اجىراماۋىمىز كەرەك» دەگەن بولاتىن. قازاقتىڭ سالت-ءداستۇرى مەن ادەت-عۇرپى، مادەنيەتى دە ۇلتتىڭ كيىمىندە. وسى جىلى ەڭبەك ۇجىمدارى مەن وقۋ ورىندارى ۇلتتىق ناقىشتا كيىنۋ ءۇردىسىن ەنگىزگەنىن بايقاپ ءجۇرمىز. وسىنداي باستامانى باتىسقازاقستاندىق ءبىلىم ۇيىمدارىنىڭ قولداعانى دا كوڭىل قۋانتادى. بۇگىنگى شارا – سونىڭ كۋاسى! اتا-انالار دا قولداۋ بىلدىرسە، ۇلتتىق مادەنيەتىمىزدى كورسەتەتىن ۇلتتىق ناقىشتاعى ەلەمەنتتەرمەن مەكتەپ فورماسىن مەكتەپ جارعىسىنا ەنگىزۋدى ۇسىنۋعا بولادى دەپ ويلايمىن. – دەدى قالا باسشىسى ميرجان مۇنايدارۇلى.
شارا بارىسىندا وقۋشىلار دايىنداعان كيىزدەن جاسالعان بۇيىمدار، تاقيالار مەن اشەكەيلەر جانە باسقا قولونەر بۇيىمدارىنىڭ كورمەسى ۇيىمداستىرىلدى.
ونەرلى بالعىندار ناۋرىز مەرەكەسىنە وراي كۇمبىرلەتىپ كۇي شەرتىپ، كوركەم بي، اسەم اندەرىن تارتۋ ەتتى.
ايتا كەتەيىك، 14 ناۋرىزدان باستالعان ناۋرىزناما ونكۇندىگى اياسىندا قالالىق ءبىلىم بەرۋ ۇيىمدارىندا ءار كۇنى قازاقتىڭ سالت-ءداستۇرى مەن ۇلتتىق بولمىسىن اشىپ كورسەتۋگە باعىتتالعان ءىس-شارالار ۇيىمداستىرىلىپ، ناۋرىز تويى كەڭ كولەمدە اتالىپ وتىلۋدە.
ەلميرا نۋگمانوۆا
