قازاقستاننىڭ ۇلتتىق قاۋىپسىزدىك كوميتەتى (ۇقك) رەسەي فەدەرالدىق قاۋىپسىزدىك قىزمەتىنىڭ (فقق) ارنايى جاساق جاۋىنگەرلەرى ەكى قازاقستاندىقتى اتتى، دەپ حابارلايدى "ادىرنا" ۇلتتىق پورتالى.
«بۇقارالىق اقپارات قۇرالدارىندا رەسەي فەدەراتسياسىندا تەراكت ۇيىمداستىرۋ ارەكەتى كەزىندە ەكى قازاقستان ازاماتىن رەسەيلىك كۇش قۇرىلىمدارىنىڭ جويعانى تۋرالى اقپارات جاريالاندى. ول ادامداردا قازاقستان ازاماتتىعى بار ەكەندىگى جانە بۇل تۇلعالاردىڭ رەسەيگە كەتكەنى راستالدى. بۇل فاكتى بويىنشا ۇلتتىق قاۋىپسىزدىك كوميتەتى سوتقا دەيىنگى تەرگەۋ جۇرگىزىپ جاتىر. تەكسەرۋ ارەكەتتەستىكتىڭ قولدانىستاعى ارنالارى اياسىندا رەسەيلىك فقق-مەن تىعىز بايلانىستا جۇرگىزىلۋدە»، - دەدى ۇقك سەنبىدە.
بۇعان دەيىن رەسەي فقق ارنايى جاساعىمەن بولعان ىقتيمال اتىستا ەكى قازاقستاندىقتىڭ قازا تاپقانى بەلگىلى بولعان. رەسەيدىڭ ارنايى قىزمەتتەرى ولاردى ماسكەۋدەگى سيناگوگادا تەراكت ۇيىمداستىرۋعا ارەكەتتەندى دەپ كۇدىكتەنىپ، ەر ادامداردى «ۆيلايات حوراسان» توبىنىڭ مۇشەلەرى («يسلام مەملەكەتىنىڭ» اۋعانستانداعى قاناتى، قازاقستاندا تىيىم سالىنعان تەرروريستىك ۇيىمنىڭ بولىمشەسى) دەپ اتادى.
