ادام ءومىرى ءۇشىن جاندارىن قاۋىپكە تىگىپ، ءتىلسىز جاۋمەن الىسقان ناعىز باتىرلار - ءورت سوندىرۋشىلەر. ءولىم مەن ءومىردىڭ اراسىندا جانتالاسىپ، قىزمەتى مەن مىندەتىن ابىرويلى اتقاراتىندار دا وسى جاندار. ەرەن ەرلىكتىڭ ۇلگىسىن تانىتىپ، ۇنەمى قۇرال-سايماندارىن ساقاداي ساي دايىنداپ، كەز كەلگەن ۋاقىتقا دايىن بولۋعا بەيىم. سەبەبى، قىزىل جالىن ءمۇلت كەتۋدى كەشىرمەيدى.
وسىنداي جاۋاپكەرشىلىگى مول جۇمىستى اتقارىپ جۇرگەن ءورت ءسوندىرۋشىنىڭ ءبىرى - اقتوبە وبلىسى تەمىر اۋدانى شۇبارقۇدىق كەنتىنىڭ № 16 ءورت ءسوندىرۋ ءبولىم باستىعىنىڭ ورىنباسارى، ازاماتتىق قورعاۋ كاپيتانى جانتورە اقنۇرمەن تىلدەسكەن ەدىك.
ءورت ءسوندىرۋ مەكەمەسىندە 6 جىل ابىرويلى ەڭبەك ەتىپ كەلەدى.
اقنۇر قىزمەت ەتەتىن ءبولىم تەك ءورت ءسوندىرۋ جۇمىستارىمەن عانا ەمەس، اۆاريالىق-قۇتقارۋ قىزمەتىمەن دە اينالىسادى. اۋدان بويىنشا شاقىرتۋ كوپ تۇسەتىن مەكەمە دە وسى جەر.
فوتو: كەيىپكەردىڭ جەكە مۇراعاتىنان
ماماننىڭ ايتۋىنشا، بولىمگە كۇنىنە ونداعان قوڭىراۋ شالىنىپ، قىزمەتكەرلەر اياقتارىنان تىك تۇرىپ جۇمىس ىستەيدى. دابىل قاعىلا سالا، وقيعا بولعان جەرگە لەزدە جەتەدى.
«ورتتە ءار سەكۋند باعالى»
«ءبىز ءورتتى ءسوندىرىپ قانا وتىرمايمىز. اۋداندا ءتۇرلى توتەنشە جاعدايلار بولادى. ءتورت مەزگىلدىڭ ءار ءتۇرلى قاۋىپىنە تاپ بولعان ادامدارعا كومەك قولىمىزدى سوزامىز. قىستا بورانعا قالىپ، اداسىپ كەتەتىندەر بار، كەيدە مالىن ىزدەپ شىعاتىندار تۇمانعا قالىپ قويادى. كوكتەمدە سۋ تاسيدى، جازدا ىستىقتان ءورت كوپ بولسا، كۇزدە جينالعان، قۇرعاعان شوپتەردىڭ ورتەنۋى كوپ بولادى. وسىنداي ءتۇرلى توتەنشە جاعدايلار ءجيى ورىن الادى.
توتەنشە جاعدايلار كەزىندە ءتۇرلى وقيعا بولادى. ادامدى قۇتقارىپ امان الىپ قالساق، قۋانىپ، وزىمىزگە ريزا بولامىز. ال وكىنىشكە قاراي، ۇلگەرە الماي قالىپ، ادام ءومىرى قيىلسا، جانىمىز اۋىرادى. ء“ورت سوندىرۋشىلەر لەزدە كەلمەدى” دەپ ايىپتاپ جاتادى. بىراق ولار بىردەن حابارلاسپاي، ءبىرى ۆيدەوعا ءتۇسىرىپ جاتادى، ءبىرى ءوزىم سوندىرەم دەپ، 10-15 مينۋتتان كەيىن حابارلاسىپ جاتادى، ءبىرى ابدىراپ كەش قالادى. ورتتە ءار سەكۋند باعالى. 15-20 مينۋت جاڭعان ءورت بوي بەرمەيدى. ءبىز بارعاننىڭ وزىندە ايماقتا نە بار ەكەنىن، گاز، بالون نەمەسە ادام بار ەكەنىن انىقتاپ، بارلاۋىمىز قاجەت. الدىمەن، ادامدى قۇتقارىپ، كەيىن قاۋىپتى زاتتاردىڭ جارىلماۋىن قاداعالايمىز»، - دەيدى جانتورە اقنۇر.
اقنۇر قىزمەت ەتەتىن ءبولىمنىڭ تەحنيكالىق جابدىقتارى مەن ءورت ءسوندىرۋ اۆتوموبيلدەرى تۇگەلدەي جاڭا. ماماندار ءۇشىن دە جاعداي جاسالعان.
«اۋدان بويىنشا، ءورت ءسوندىرۋ قىزمەتىنىڭ تەحنيكاسى وتە جاقسى. 80-90% تەحنيكا جاڭا. ءبىزدىڭ بولىمدە 2 اۆتوتسيستەرنا بار. ەكەۋى دە جاڭا. 23 ادام جۇمىس ىستەيدى. كەزەكشىلىكتە 5 ادامنان كەم بولمايدى. ءبارى جۇمىسىنا ادال. كەيدە جۇمىسقا جاڭادان جاستار كەلىپ جاتادى. كەيبىرى 1-2 اي ىستەپ، جۇمىستىڭ قيىندىعىنا ۇيرەنە الماي، جالاقىعا دا قاراپ، شىعىپ كەتەدى. نيەتى باسىندا اقشا بولعاندار، ادامعا كومەكتەسە المايدى. ءبىزدىڭ جۇمىس ادالدىقتى تالاپ ەتەدى»، - دەيدى مامان.
«قاي كەزەكشىلىك سوڭعىسى بولاتىنىن بىلمەيمىز»
ءورت سوندىرۋشىلەر ۇنەمى فيزيكالىق جانە پسيحولوگيالىق دايىندىقتان ءوتىپ تۇرادى. كۇندەلىكتى ارنايى كيىمدەرىن ساقاداي ساي دايىنداپ، تەمىردەي تارتىپكە بەيىمدەلگەن. كۇندەلكىتى كەزەكشىلىگىن ءبىر-بىرىنە ابىرويمەن تاپسىرىپ، جاۋاپكەرشىلىكپەن قابىلداپ الادى.
«قىزمەتكەرلەر قيىن وقيعادان كەيىن وزدەرىنە قابىلداپ، ۇمىتا الماي جۇرەتىن كەزدەرى بولادى. ءبىز بارعانشا ادام قايتىس بولسا، “نەنى دۇرىس ىستەمەدىك، ەرتەرەك بارعاندا ۇلگەرەتىن ەدىك قوي” دەپ قاپالانادى.
ءوز ومىرىڭنەن وزگەنىڭ ءومىرى ماڭىزدى بولادى. الدىڭدا نە بولاتىنىن بىلمەيسىڭ، ءاردايىم وقىس وقيعاعا دايىن بولاسىڭ. قاي كەزەكشىلىك سوڭعىسى ەكەنىن بىلمەيمىز. بىرىندە اشىق تۇرعان توق جاۋىڭ، بىرىندە بيىكتىك، بىرىندە ءورت، بىرىندە سۋ. باستىسى ادام جانىنىڭ اماندىعى»، - دەپ ءسوزىن قورىتىندىلادى جانتورە اقنۇر.
دانا نۇرمۇحانبەت
“ادىرنا” ۇلتتىق پورتالى
