Adam ómiri úshin jandaryn qaýipke tigip, tilsiz jaýmen alysqan naǵyz batyrlar - órt sóndirýshiler. Ólim men ómirdiń arasynda jantalasyp, qyzmeti men mindetin abyroıly atqaratyndar da osy jandar. Eren erliktiń úlgisin tanytyp, únemi qural-saımandaryn saqadaı saı daıyndap, kez kelgen ýaqytqa daıyn bolýǵa beıim. Sebebi, qyzyl jalyn múlt ketýdi keshirmeıdi.
Osyndaı jaýapkershiligi mol jumysty atqaryp júrgen órt sóndirýshiniń biri - Aqtóbe oblysy Temir aýdany Shubarqudyq kentiniń № 16 Órt sóndirý bólim bastyǵynyń orynbasary, azamattyq qorǵaý kapıtany Jantóre Aqnurmen tildesken edik.
Órt sóndirý mekemesinde 6 jyl abyroıly eńbek etip keledi.
Aqnur qyzmet etetin bólim tek órt sóndirý jumystarymen ǵana emes, avarııalyq-qutqarý qyzmetimen de aınalysady. Aýdan boıynsha shaqyrtý kóp túsetin mekeme de osy jer.
Foto: keıipkerdiń jeke muraǵatynan
Mamannyń aıtýynsha, bólimge kúnine ondaǵan qońyraý shalynyp, qyzmetkerler aıaqtarynan tik turyp jumys isteıdi. Dabyl qaǵyla sala, oqıǵa bolǵan jerge lezde jetedi.
«ÓRTTE ÁR SEKÝND BAǴALY»
«Biz órtti sóndirip qana otyrmaımyz. Aýdanda túrli tótenshe jaǵdaılar bolady. Tórt mezgildiń ár túrli qaýipine tap bolǵan adamdarǵa kómek qolymyzdy sozamyz. Qysta boranǵa qalyp, adasyp ketetinder bar, keıde malyn izdep shyǵatyndar tumanǵa qalyp qoıady. Kóktemde sý tasıdy, jazda ystyqtan órt kóp bolsa, kúzde jınalǵan, qurǵaǵan shópterdiń órtenýi kóp bolady. Osyndaı túrli tótenshe jaǵdaılar jıi oryn alady.
Tótenshe jaǵdaılar kezinde túrli oqıǵa bolady. Adamdy qutqaryp aman alyp qalsaq, qýanyp, ózimizge rıza bolamyz. Al ókinishke qaraı, úlgere almaı qalyp, adam ómiri qıylsa, janymyz aýyrady. “Órt sóndirýshiler lezde kelmedi” dep aıyptap jatady. Biraq olar birden habarlaspaı, biri vıdeoǵa túsirip jatady, biri ózim sóndirem dep, 10-15 mınýttan keıin habarlasyp jatady, biri abdyrap kesh qalady. Órtte ár sekýnd baǵaly. 15-20 mınýt jańǵan órt boı bermeıdi. Biz barǵannyń ózinde aımaqta ne bar ekenin, gaz, balon nemese adam bar ekenin anyqtap, barlaýymyz qajet. Aldymen, adamdy qutqaryp, keıin qaýipti zattardyń jarylmaýyn qadaǵalaımyz», - deıdi Jantóre Aqnur.
Aqnur qyzmet etetin bólimniń tehnıkalyq jabdyqtary men órt sóndirý avtomobılderi túgeldeı jańa. Mamandar úshin de jaǵdaı jasalǵan.
«Aýdan boıynsha, órt sóndirý qyzmetiniń tehnıkasy óte jaqsy. 80-90% tehnıka jańa. Bizdiń bólimde 2 avtoısterna bar. Ekeýi de jańa. 23 adam jumys isteıdi. Kezekshilikte 5 adamnan kem bolmaıdy. Bári jumysyna adal. Keıde jumysqa jańadan jastar kelip jatady. Keıbiri 1-2 aı istep, jumystyń qıyndyǵyna úırene almaı, jalaqyǵa da qarap, shyǵyp ketedi. Nıeti basynda aqsha bolǵandar, adamǵa kómektese almaıdy. Bizdiń jumys adaldyqty talap etedi», - deıdi maman.
«QAI KEZEKShILIK SOŃǴYSY BOLATYNYN BILMEIMIZ»
Órt sóndirýshiler únemi fızıkalyq jáne psıhologııalyq daıyndyqtan ótip turady. Kúndelikti arnaıy kıimderin saqadaı saı daıyndap, temirdeı tártipke beıimdelgen. Kúndelkiti kezekshiligin bir-birine abyroımen tapsyryp, jaýapkershilikpen qabyldap alady.
«Qyzmetkerler qıyn oqıǵadan keıin ózderine qabyldap, umyta almaı júretin kezderi bolady. Biz barǵansha adam qaıtys bolsa, “neni durys istemedik, erterek barǵanda úlgeretin edik qoı” dep qapalanady.
Óz ómirińnen ózgeniń ómiri mańyzdy bolady. Aldyńda ne bolatynyn bilmeısiń, árdaıym oqys oqıǵaǵa daıyn bolasyń. Qaı kezekshilik sońǵysy ekenin bilmeımiz. Birinde ashyq turǵan toq jaýyń, birinde bıiktik, birinde órt, birinde sý. Bastysy adam janynyń amandyǵy», - dep sózin qorytyndylady Jantóre Aqnur.
Dana Nurmuhanbet
“Adyrna” ulttyq portaly
