تالعات جولداسۇلى: بەس بەتتىك ماقالانى ءبىر اۆتور جازادى، سوسىن ءۇش-ءتورت اۆتور مىنگەسەدى

1488
Adyrna.kz Telegram

قازاقستاندا عىلىم دەگەن عىلىم ءۇشىن جاسالمايدى، عىلىم ادەتتە وتچيوت ءۇشىن، ماقالانىڭ سانىن كوبەيتۋ ءۇشىن جانە ۋنيۆەرسيتەتتىڭ نەمەسە بەلگىلى ءبىر ينستيتۋتتىڭ كورسەتكىشى، رەيتينگى ءۇشىن جاسالادى. سوندىقتان ءبىرىنشى ساپاعا ەمەس، ماقالانىڭ سانىنا ءمان بەرىلەدى. سوسىن ءسويتىپ "ۆەستنيكتەردەگى" بەس بەتتىك ماقالانى ءبىر اۆتور جازادى، سوسىن وعان ءۇش-ءتورت اۆتور مىنگەسەدى. ويتكەنى عالىمعا ەسەپ كەرەك، ەسەپ بەرۋ ءۇشىن ماقالا كەرەك، ال ۋنيۆەرسيتەتكە رەيتينگ كەرەك، رەيتينگ ءۇشىن ماقالانىڭ سانى كەرەك، ناتيجەسىندە ەكەۋى دە رازى...

سوسىن Scopus پەن Wos-قا ماقالا جاريالاۋ مىندەتتى بولعانى ءۇشىن قازەكەڭ اقشا بەرىپ كەز كەلگەن تاقىرىپتاعى ماقالاعا دا سواۆتور بولىپ مىنگەسىپ كەتە بەرەدى. مىسالى، ءبىر تاريحشى ءوز عىلىمي سالاسىن نەمەسە ءوز زەرتتەۋ كەزەڭىن بىلاي قويعاندا، ءتىپتى تاريح سالاسىنا قاتىسى جوق ەكولوگيا سالاسىنىڭ ءبىر ماقالاسىنا دا اقشا بەرىپ مىنگەسىپ الادى. ەڭ قىزىعى، سول ەكولوگيا سالاسىنداعى ماقالاسى ءۇشىن ول تاريحشىنىڭ حيرشاسى دا وسەدى. ال، حيرشاڭ بولسا، قازاق عىلىمىندا اۆتوريتەتسىڭ، حيرشا بولماسا، ادام ەمەسسىڭ، سەنىڭ قاي سالادا ماقالا جاريالاعانىڭ ماڭىزدى ەمەس...

وسىلايشا، رەيتينگ قۋعان ءھام ۇنەمى اسىعىپ جۇرەتىن ءبىزدىڭ قاعازباستى قازەكەڭ جانە ءبىزدىڭ عىلىمي جۇيە بۇل ماسەلەنىڭ دە باياعىدا شەشىمىن تاۋىپ قويدى. ايتپاقشى، مەن بارىنە توپىراق شاشىپ وتقام جوق. مەن "ادەتتە" دەدىم، ءبارى دەگەن جوقپىن جانە ەشقاشان Scopus, WoS كەرەك ەمەس دەگەن ءسوزدى ايتقان ەمەسپىن ء(سوزدىڭ توركىنىن تۇسىنبەي لاعىپ كەتەتىن قازاقتارعا ەسكەرتۋ ). نەگىزى كۇلەتىن نارسە ەمەس.

 

Talgat Zholdassuly

 

 

 

پىكىرلەر