"قازاقستان سىرتقا ەسىكتى ايقارا اشقان، ازۋىن ايعا بىلەگەن الىپ ەلدەر قاتارپىنا ەنىپ كەلەدى" - دەپ، ۇرانداتقاندا الدىمىزعا جان سالمايمىز. ء"لاپپاي تاقسىر!" - دەيتىن مومىن حالىق وعان دا سەنىپ كەلدى. ەرتەگىمەن ەلدى الداعان الدامشى بيلىكتىڭ اقىر اياعى توز-توزى شىعىپ، سانسىراي باستادى. مۇنى بيلىك تە، ەلباسى دا سەزدى. سەزدى دە قادامدى قالت بۇرىپ، كۇتپەگەن شەشىم جاسادى. وسىلايشا، ەلباسىمىز 30 جىل ومالىپ وتىرعان تاعىنان كەتكەندەي سىڭاي تانىتتى...
حالىق ءالى بەيقام كۇيدە... ءولىارا ۇيقىداعى جۇرتتى ۋكراين حالقى سەلت ەتكىزدى. انىعى لاپ ەتكىزدى. ءار كىمنىڭ ىشىندە تۇتانىپ، بىقسىپ جاتقان شوق وتقا اينالعان كۇي كەشتىك. ەشكىمنىڭ بۇيرىعى، نۇسقاۋىنسىز-اق، حالىق ورە تۇرەگەلدى. ءدال وسىنداي سەرپىندەگى ەلدىڭ اڭىسىن اڭداپ جاتقان ءا.قوسانوۆ ەل اراسىنان "مەن قاراپايىم اۋىل بالاسىمىن" دەپ جارقىراپ-جايناپ شىعا كەلدى. جىلت ەتكەن ءۇمىت جانىمىزعا مايداي جاعىپ، جاپپاي قوسانوۆقا داۋىس بەردىك. "سەنگەن قويىم سەن بولساڭنىڭ" كەبىن كيىپ، ول دا ساياسي ولىك بولىپ شىقتى. بالكىم بيلىكتىڭ قىسىمان با ەكەن، تابان تىرەپ سوڭىنا دەيىن "باستەسۋگە" شىداس بەرمەدى. سوڭعى ساتتەردە "لاپپايلاعاننىڭ كوكەسىن" ءامىرجان مىرزا كورسەتتى. سايلاۋعا بارامىز دەپ سانىمىزدى سيپاپ قالدىق. ءالى ءۇمىت سونبەپ ەدى...
نامىستى حالىق اتويلاتىپ تاعى شەرۋگە شىقتى. سەبەبى زەلەنسكي سياقتى رۋحتى سوزبەن، وتتى كوزبەن قادام باساتىن جاڭا باسشىنى كۇتكەن ەدى. دەمەك، كەلەسى قادام (شەرۋ) قوسانوۆ ءۇشىن ەمەس ەكەنى ايدان انىق. سالى سۋعا كەتىپ اشىنعان حالىقتى كۇشتىكقۇرلىمدار ارقىلى باسۋ عانا قولىنان كەلدى ءبىزدىڭ بيلىكتىڭ. كارى جاس دەمەي جۇلقىلادى، ۇردى-سوقتى، قينادى... جازىقسىز جۇرتتى تيتىقتاتۋ ءۇشىن تىم قۇرىعاندا ايىپپۇل ارقالاتتى. اراسىندا رينات زايىتوۆ تا جالت ەتتى دە جوق بولدى. مەيلى، قالاي بولماسىن، قاراپايىم حالىق ۇكىمەتكە ءالجۋاز، ۇركەك حالىق ەمەس ەكەنىن دالەلدەگىسى كەلدى. امال نەشىك، رۋح بار بيلىك جوق... ءالى دە سونبەگەن ءۇمىت، ولمەگەن رۋح... الىپ اتىراپتاعى رۋحى سونبەگەن ارىستارىمىز - ابىلاي، كەنەسارى، قابانباي، بوگەنبايلاردىڭ ۇرپاعى ەكەنىمىزدى كورسەتكىمىز كەلدى. مەملەكەتكە دەگەن اشۋ قاراداي قىسىپ، تاعى دا ءبىر شەرۋلەردىڭ شەتىن شىعارۋعا تىستەنىپ جۇرگەندە، ارىستاعى قويما "ۆۋاليا" دەپ جارىلا قالدى. سوڭعى اقپاراتتار بويىنشا جارىلىستان 2 ادام قازا تاپتى. 89 ادام جاراقات الىپ، اۋرۋحاناعا ءتۇستى. ءبارى جان ساۋعالاپ قاشتى. بالالار اناسىنان كوز جازىپ، كۇيىسى كەتىپ، ءوز ۇياسىنان اداسىپ قالدى. بەيبىت كۇندە بەي-بەرەكەت،توز-توزى شىقتى. دالا شاڭعا، اسپان تۇتىنگە تۇنشىقتى...
ءولى تىنىشتىق... حالىق قويانداي ۇركىپ، وتكەن-كەتكەنگە جالتاق-جالتاق ەتىپ ءمۇساپىردىڭ كۇيىن كەشۋدە.
ءسىزدىڭ شە، جوعارىداعى اتالعان جاعدايلار تۇگەلىمەن دەرلىك كەزدەيسوقتىق دەپ ويلايسىز با، الدە ءتاڭىردىڭ ماڭدايعا جازعان ء"تاتتى سىيى" ما؟ جو..جوق، كوكەم! جەل تۇرماسا ءشوپتىڭ باسى قيمىلدامايدى. تالاي جىل جارىلماعان سناريادتتار اياق استى تارسىلداپ قويا بەردى. قانداي كۇشتى ەرتەگى ءا؟... باياعى تاريحي سۇرلەۋدىڭ جالعاسى ەمەس پە دەگەن وي كەلەدى مۇندايدا. ايتپەسە تىنىش كۇندە "وقتاۋسىز جاتقان مىلتىقتىڭ" بىلتەسىن بىرەۋ تارتپاسا، تاپا-تال تۇستە وقىس وقيعانىڭ ورىن الاتىنى قالاي؟ تىپتەن بۇنداي ۇلكەن جارىلىس قولىندا قۇزىرەتى بار "قۇدىرەتتى پەندەنىڭ" عانا قولىنان كەلەتىنى بەسەنەدەن بەلگىلى. ۇكىمەت تاراپى سوعىستىڭ نە ەكەنىن مۇلدەم ۇمىتىپ قالعان بىزگە، "بەيبىت كۇننىڭ قادىرىن ءبىل اعايىن!" - دەگىسى كەلگەن سىڭايلى. مەنىڭشە ءدال وسى قادام ارقىلى جارىلىس ءوز ميسسياسىن جاقسى اتقارعان كورىنەدى. جارىلىس دەپ ءجۇرىپ، ميتينگتىڭ "م" دەگەن ارىپىندە ۇمىتىپ قالدىق. شىنىندا، شەمەن مۇڭىن شەرگە اينالىپ وتىرعاندا شەرۋگە شىعۋعا شامان قايدان كەلسىن، قايران قازاعىم؟!
قازىرگى بايلىق - حالىق. بايلىعىمىز سەتىنەمەسىن! نە دە بولسا، جۇرتىمىز امان، ەلىمىز تىنىش بولسىن! سوعىسسىز ءومىر، بەيبىت تىرلىك حالىقتىڭ دا باستى ارمان-ماقساتتارىنىڭ ءبىرى. ءتىپتى، كۇندەلىكتى تىلەگى! ەندەشە جۇرت تىلەۋى قابىل بولسىن! حالقىم امان بولعاي!
اقگۇل ايداربەكوۆا
ادىرنا ۇلتتىق پورتالى
