قازاقستاندا 6 مىڭ اتا-انا تىركەۋگە قويىلىپ، 12 مىڭ اتا-انا جاۋاپكەرشىلىككە تارتىلدى، دەپ حابارلادى "ادىرنا" ۇلتتىق پورتالى ىشكى ىستەر مينيسترلىگى اكىمشىلىك پوليتسيا كوميتەتى باسقارماسىنىڭ باستىعى اسەت وسپانوۆتىڭ بايانداماسىنا سىلتەمە جاساپ.
"بالالاردى تاربيەلەۋگە قاتىستى مىندەتتەردى اتقارمايتىن 6 مىڭنان استام اتا - انا پروفيلاكتيكالىق تىركەۋگە الىندى", - دەدى وسپانوۆ دۇيسەنبىدە وتكەن بريفينگتە.
ونىڭ اقپاراتى بويىنشا، ومىرلىك قيىن جاعدايعا تاپ بولعان 2 مىڭنان استام وتباسى انىقتالدى، ولار تۋرالى اقپارات مۇددەلى مەملەكەتتىك ورگاندارعا جىبەرىلدى. ولارعا قاتىستى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيالاردا 1800 ماتەريال قارالدى، 600-دەن استام ادام اتا-انا قۇقىقتارىنان ايىرىلدى جانە 340 ادام شەكتەلدى، اتا-انا مىندەتتەرىن ورىنداماعانى ءۇشىن 12 مىڭنان استام ادام اكىمشىلىك جاۋاپكەرشىلىككە تارتىلدى.
سونداي-اق، وقۋ جىلىنىڭ باسىنان باستاپ ىشكى ىستەر ورگاندارى باقىلاۋعا العان قوعامعا قارسى ءىس-ارەكەتتەر جاساۋعا بەيىم جاسوسپىرىمدەر اراسىندا 1400-دەن استام بەيرەسمي كوشباسشىلار انىقتالدى، كامەلەتكە تولماعاندار اراسىنان بوپسالاۋدىڭ 40 فاكتىسىنىڭ الدىن الدى.
بالالارعا قاتىستى زورلىق-زومبىلىق فاكتىلەرىن انىقتاۋ ءۇشىن پوليتسيا ارەكەتتەرىنىڭ قادامدىق الگوريتمى ازىرلەندى، وعان سايكەس بالالار وگەي اكەلەرىمەن جانە وگەي شەشەلەرىمەن بىرگە تۇراتىن وتباسىلارعا ەرەكشە نازار اۋدارىلادى.
2023 جىلعى جەلتوقساندا مەملەكەتتىك ورگاندارمەن بىرلەسىپ زورلىق-زومبىلىققا، قۋدالاۋعا، كيبەربۋللينگكە ۇشىراعان كامەلەتكە تولماعانداردى ەرتە انىقتاۋ جانە ولارعا كومەك كورسەتۋ جونىندەگى ارنايى ادىستەمە بەكىتىلدى. اكىمدىكتەر جانىنان بالا قۇقىقتارى جونىندەگى وڭىرلىك ۋاكىلدەردىڭ، ءبىلىم بەرۋ، حالىقتى الەۋمەتتىك قورعاۋ قىزمەتكەرلەرىنىڭ، ۋچاسكەلىك پوليتسيا ينسپەكتورلارىنىڭ قاتىسۋىمەن بالالارعا قاتىستى زورلىق-زومبىلىقتى انىقتاۋ جانە وعان دەن قويۋ ءۇشىن ۆەدومستۆوارالىق ءموبيلدى توپتار قۇرىلدى.
اقپارات الماسۋ Whatsapp چاتتارىندا جۇزەگە اسىرىلادى.
