NEET ساناتىنداعى جۇمىسسىز جاستاردىڭ قاتارىن تولىقتىرىپ جۇرگەن بۇل ازامات ويعا العان ءىسىن تۇنگى ۋاقىتتا جۇزەگە اسىرىپ كەلگەن، دەپ حابارلايدى «ادىرنا» ءتىلشىسى.
جىگىت كەش قارايعان شاقتا جولدا جالعىز كەلە جاتقان قىزداردى تۇنشىقتىرىپ، كەيىن باعالى زاتتارىن قولدى قىلىپ وتىرعان.
“جەدەل-ىزدەستىرۋ ءىس-شارالارى بارىسىندا 20 جاستاعى جامبىل وبلىسىنىڭ تۇرعىنى ۇستالدى. قازىرگى ۋاقىتتا توناۋ بويىنشا ءۇش دەرەكتى انىقتادىق. ءبىر ەپيزود بەينەباقىلاۋ كامەرالارىنا ءتۇسىپ قالعان. قىزدار توتەپ بەرە المايتىن جاعدايعا جەتكەن كەزدە، ول بارلىق قۇندى زاتتاردى: ۇيالى تەلەفونداردى، اقشانى الىپ، قاراڭعى كوشەلەردە تىعىلىپ قالعان. سونداي-اق قاسكوي جابىرلەنۋشىدەن تارتىپ العان اقشامەن دۇكەندە تولەم جاساعانى دا انىقتالدى. ول ءوز ءىسىن مويىندادى. قازىر كۇدىكتىنىڭ قالاداعى وسىعان ۇقساس بۇرىن جاسالعان قىلمىستارعا قاتىسى بار-جوعى تەكسەرىلىپ جاتىر. سوتقا دەيىنگى تەرگەۋ امالدارى جۇرگىزىلۋدە”، – دەدى المالى اۋداندىق پوليتسيا باسقارماسىنىڭ باستىعى ەسەن ىسقاقوۆ.
