باشقۇرتستاندا فايل السىنوۆتى قولداۋ اكتسياسىنا قاتىسقان ءتورت ادام ەكى ايعا قاماۋعا الىنعان. الايدا ۇستالعانداردىڭ ءبىرى قازا تاپتى، دەپ حابارلايدى "ادىرنا" ءتىلشىسى "ناستوياششەە ۆرەميا" سايتىنا سىلتەمە جاساپ.
17 قاڭتاردا بايماق قالالىق سوتىندا بەلسەندى فايل السىنوۆقا ءتورت جىل باس بوستاندىعىنان ايىرىپ، اباقتىعا جابۋ ۇكىمى وقىلدى.
18 قاڭتار كۇنى باشقۇرتستانداعى بايماق قالاسىنىڭ ون مىڭنان اسا تۇرعىنى سوت عيماراتىنىڭ الدىنا ميتينگىگە شىققان. باسىلىمنىڭ اقپاراتىنشا، 20 شاقتى ادام مەديتسينالىق كومەك العان.
19 قاڭتار كۇنى باشقۇرتستان استاناسى ۋفادا جۇزدەگەن ادامنىڭ قاتىسۋىمەن ەرەۋىل اكتسياسى ءوتتى. السىنوۆتىڭ جاقتاستارىن پوليتسيا قاماۋعا العان.
ازاتتىقتىڭ اقپاراتىنشا، نارازىلىق ءبىلدىرۋ اكتسياسى كەزىندە ۇستالعانداردىڭ ءبىرى ريفات داۋتوۆ قازا تاپقان. داۋتوۆتىڭ ءولىمىن مارقۇمنىڭ اپكەسى زاليا داۋتوۆا حابارلاعان.
ول ءىنىسىنىڭ ۋفادا ورتالىق الاڭدا اكتسيا ءوتىپ جاتقان كەزدە سول ماڭعا جاقىن جەردە بولعانىن ايتادى.
كەيىننەن 19 قاڭتاردا داۋتوۆقا پوليتسيا قىزمەتكەرى ەسكەرتۋ جاساعان كورىنەدى. 25 قاڭتار كۇنى قالادان شىققان داۋتوۆتى ارنايى جاساق بەلگىسىز جەرگە الىپ كەتكەن. كوپ ۋاقىت وتپەي داۋتوۆتىڭ دەنەسىن تانۋعا تۋىستارىن شاقىرىپ، ءمايىتحانادا ولارعا مارقۇمنىڭ دەنەسىن كورسەتپەگەن.
