قازاقستاندىق سەناتور سەرگەي ەرشوۆ فەدەرالدى تەلەارنالاردىڭ بىرىندە كورسەتىلگەن رەسەيلىك تاريحشى ميحايل ءسموليننىڭ ورتالىق ازيا حالىقتارى تۋرالى مالىمدەمەسىنە قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
سەنات وتىرىسىندا جۋرناليستەر دەپۋتاتتىڭ مۇنداي مالىمدەمەلەرگە قالاي قارايتىنىن سۇرادى.
"كوپ نارسە وزگەردى. بىراق رەسمي تاريح بار. ءبىزدى كەڭەس وداعى كەزىندە باسقاشا وقىتتى، قازىر باسقا. ال اتالعان ەلدەردىڭ تاريحى وتە تەرەڭدە. بۇل جەردە تۇرىكتەر بولعان، ولار بار جانە بولا بەرەدى. كىمنىڭ نە ايتاتىنى ەكىنشى ورىندا. سوندىقتان وزگەنىڭ پىكىرىن بۇلاي قابىلداماۋىمىز كەرەك. كىم نە ايتپاي جاتىر", - دەيدى سەرگەي ەرشوۆ.
سەناتوردىڭ ايتۋىنشا، مۇنداي ارانداتۋشىلىق بىرەۋدىڭ ادەيى جاساعان ءىسى ەكەنى انىق.
“بۇل ءبىزدىڭ ارامىزداعى (قازاقستان مەن رەسەي) قارىم-قاتىناستى بۇزۋ ءۇشىن ادەيى جاسالىپ وتىر دەپ ەسەپتەيمىن. ءبىز قازاقستاندىقپىز، ءبىزدىڭ تاريحىمىز باي. ۇلى وتان سوعىسىندا بىرگە سوعىستىق، 600 مىڭ ادام قازا تاپتى. ءاربىر ءتورتىنشى قازاقستاندىق سوعىسقا قاتىستى. بۇل قاسيەتتى ءىس دەپ سانايمىن”، - دەپ قوستى پارلامەنتاري.
ەرشوۆ رەسەيگە بىرنەشە رەت بارعانىن جانە رەسەيلىك ارىپتەستەرىنەن ساياساتكەرلەردىڭ، تاريحشىلاردىڭ جانە باق وكىلدەرىنىڭ قازاقستان تۋرالى مۇنداي مالىمدەمەلەرىنە قالاي قارايتىندارىن سۇراعانىن ايتتى.
“بىزدە اقىماقتار بار دەيدى، بىراق ولاردىڭ ارقايسىسىنىڭ اۋزىنا قاقپاق بولا المايسىڭ. رەسەيدە ءبىزدىڭ تاريحىمىزدى جاقسى بىلەدى، ال قازاقتار ول جەردە جاقسى ءومىر ءسۇرىپ جاتىر. ال، ءبىز، ورىستار وسىندا جاقسى ءومىر ءسۇرىپ جاتىرمىز. ەگەر ءبىز ءاربىر اقىماقتىققا جاۋاپ بەرەتىن بولساق، نە بولادى”، - دەپ قوستى دەپۋتات.
ەسكە سالايىق، بۇعان دەيىن رەسەيلىك تاريحشى ميحايل سمولين رەسەيلىك تەلەارنالاردىڭ بىرىندە 1917 جىلعا دەيىن قازاق پەن وزبەك ۇلت رەتىندە بولماعانىن ايتقان بولاتىن.
“ادىرنا” ۇلتتىق پورتالى
