رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا ءبىر جىل بۇرىن اقتاۋدا بولعان اۋە اپاتىنا قاتىستى تەرگەۋ بارىسىنا پىكىر ءبىلدىردى. بۇل تۋرالى ۆەدومستۆونىڭ رەسمي سايتى جازدى، دەپ حابارلايدى "ادىرنا".
زاحاروۆا اۋە اپاتىن «بارشاعا ورتاق تراگەديا» دەپ اتادى، ويتكەنى وقيعا سالدارىنان رەسەي، ازەربايجان جانە قازاقستان ازاماتتارى قازا تاۋىپ، قىرعىزستان ازاماتتارى زارداپ شەككەن.
«جاقىندارىنان ايىرىلعان بارلىق ادامداردىڭ قايعىسى مەن قاسىرەتىن تولىقتاي بولىسەمىز. اپاتتىڭ باستاپقى سەبەبى — كيەۆ رەجيمىنىڭ رەسەيدىڭ ازاماتتىق ينفراقۇرىلىم نىساندارىنا قارسى ۇشقىشسىز ۇشۋ اپپاراتتارى ارقىلى جاساعان تەرروريستىك شابۋىلدارى»، - دەدى رەسەي ۆەدومستۆوسىنىڭ وكىلى.
ول بۇعان دەيىن ۆلاديمير ءپۋتيننىڭ تراگەديالىق وقيعانىڭ رەسەي اۋە كەڭىستىگىندە بولعانىنا بايلانىستى ازەربايجان پرەزيدەنتى يلحام اليەۆتەن رەسمي تۇردە كەشىرىم سۇراعانىن ەسكە سالدى.
«اپاتتىڭ بارلىق ءمان-جايىن حالىقارالىق تەرگەۋ قازاقستان رەسپۋبليكاسى كولىك مينيسترلىگى جانىنان قۇرىلعان ارنايى كوميسسيا جۇرگىزىپ جاتىر. رەسەي تاراپى وسى قۇرىلىممەن تىعىز ىنتىماقتاستىق ورناتىپ، قاجەتتى كومەكتىڭ بارلىعىن كورسەتۋدە. رەسەيدىڭ اۆياتسيالىق ورگاندارى قازاقستاندىق ارىپتەستەردەن تۇسكەن بارلىق ساۋالدارعا جاۋاپ بەردى.
جاقىن ۋاقىتتا قازاقستاندىق كوميسسيا تەرگەۋدى اياقتايدى جانە ءبىز بۇل قايعىلى وقيعاعا قاتىستى قالعان بارلىق سۇراقتاردى بىرلەسىپ جابامىز دەپ ۇمىتتەنەمىز. بۇعان ەشكىمنىڭ كۇمانى بولماۋى ءتيىس»، - دەپ تۇيىندەدى زاحاروۆا.
ەسكە سالايىق، 2024 جىلعى 25 جەلتوقساندا باكۋ – گروزنىي باعىتىمەن ۇشقان J2-8243 رەيسى اقتاۋ ماڭىندا اپاتقا ۇشىراپ، 38 ادام قازا تاپتى، 29 ادام زارداپ شەكتى.
بوگدە مەتالل زاتتارعا جاسالعان ساراپتاما جارىلعىش زاتتاردىڭ ءىزىن انىقتاعان جوق، وتتەگى باللوندارىندا جارىلىس بەلگىلەرى جوق.
اۋە كەمەسىنىڭ زاقىمدانۋى وق-ءدارى بولىكتەرىنىڭ زاقىمداۋشى ەلەمەنتتەرىنەن بولۋى مۇمكىن دەگەن بولجام ايتىلعانىمەن، ولاردىڭ ناقتى قايدان شىققانى انىقتالماعان.
