حالىقارالىق ۆاليۋتا قورىنىڭ (حۆق) قازاقستانداعى ميسسياسىنىڭ جەتەكشىسى نيكولاس بلانشە جىل اياعىندا قازاقستانداعى ينفلياتسيا رەسمي بولجانعان دەڭگەيدەن اسىپ ءتۇسۋى مۇمكىن ەكەنىن مالىمدەدى، دەپ حابارلايدى «ادىرنا» ۇلتتىق پورتالى.
«ەكونوميكالىق بەلسەندىلىك تۇرعىسىنان ءبىز بيىلعى جىلى ەكونوميكالىق ءوسىمنىڭ ايتارلىقتاي كۇشتى بولعانىن بايقاپ، كەلەسى ايدىڭ سوڭىنا قاراي جالپى جىل بويىنشا ءوسىم 4,8% بولادى دەپ بولجادىق. بۇل مۇناي جانە مۇناي سەكتورلارىنىڭ جۇمىسىمەن قامتاماسىز ەتىلگەن. سونىمەن قاتار ۋكرايناداعى سوعىستىڭ سالدارى قاتتى اسەر ەتپەگەنىن اتاپ وتكەن ءجون. ينفلياتسيا تومەندەپ جاتىر، وزدەرىڭىز بىلەسىزدەر، اقپان ايىندا ول 21%-عا جەتتى، قازىر 11%-دان ءسال عانا تومەن. بىز ينفلياتسيا جىل سوڭىنا ارنالعان بولجامنان ءسال اسىپ كەتەدى دەپ ويلايمىز»، - دەپ بلانشە سەيسەنبى كۇنى استانادا وتكەن بريفينگتە ءوز بولجامدارىن ايتتى.
بۇل رەتتە ول ينفلياتسيا 5% نىسانالى كورسەتكىشتەن جوعارى ساقتالاتىنىن اتاپ ءوتتى. سونداي-اق تۇرعىن ءۇي-كوممۋنالدىق شارۋاشىلىق پەن ەنەرگەتيكالىق رەسۋرستارعا تاريفتەردىڭ كوتەرىلۋىنە بايلانىستى حۆق ونى وڭ باعالايدى جانە قۇپتايدى، بىراق ءبارىبىر ينفلياتسيانىڭ جوعارى دەڭگەيدە قالۋىنا اكەلىپ سوقتىرۋى مۇمكىن ەكەنىن ەسكەرتەدى.
«كەلەسى جىلى قازاقستان ەكونوميكاسىنىڭ ءوسۋ قارقىنى ءبىرشاما قالىپتى بولادى دەپ كۇتەمىز. بۇل كورسەتكىش بيىلعىدان تومەن بولادى. ونىڭ باستى سەبەپتەرىنىڭ ءبىرى – تەڭىز كەن ورنىن كەڭەيتۋ جوباسىن ىسكە اسىرۋدىڭ كەشەۋىلدەۋىنە بايلانىستى مۇناي ءوندىرۋ كولەمىنىڭ تومەندەۋى. الداعى ۋاقىتتا ءوسىم 3-3,5% ارالىعىندا ساقتالادى دەپ كۇتەمىز. مەن شيكىزاتتىق ەمەس ءوسىم تۋرالى ايتىپ وتىرمىن. ەگەر جالپى ءوسىمدى الاتىن بولساق، ول مۇناي ءوندىرۋ كولەمىنە بايلانىستى ءارتۇرلى بولۋى مۇمكىن»، - دەپ قوستى ميسسيا باسشىسى.
ول ۇلتتىق ەكونوميكا مينيسترلىگى تاراپىنان قازاقستان ەكونوميكاسىنىڭ ءوسۋىنىڭ نەعۇرلىم وپتيميستىك بولجامدارىنا تۇسىنىكتەمە بەردى.
«بۇل بەلگىلى ءبىر دارەجەدە عانا مۇمكىن. دەگەنمەن بۇل رەفورمالاردى جەدەلدەتۋدى تالاپ ەتەدى»، - دەپ اتاپ ءوتتى بلانشە.
«ادىرنا» ۇلتتىق پورتالى
