قازاقستاندا جاڭا كونستيتۋتسيا قابىلداۋ قاجەت. بۇل تۋرالى زاڭ عىلىمدارىنىڭ كانديداتى، PhD الماس جۇماعالي ەلىمىزدىڭ قۇقىقتىق جۇيەسىن جەتىلدىرۋگە قاتىستى وتكەن جيىندا ايتتى، دەپ حابارلايدى “ادىرنا” ۇلتتىق پورتالى.
دوڭگەلەك ۇستەلگە قاتىسۋشىلار مەملەكەتتىك بيلىك مەحانيزمىندە كونستيتۋتسيالىق سوتتى قۇرۋ بيلىكتىڭ ءبولىنۋ پرينتسيپىنە، كونستيتۋتسيالىق پروتسەستىڭ ۇزدىكسىزدىگى مەن قايتىمسىزدىعىنا، مەملەكەتتىك ورگانداردىڭ قوعام مەن حالىق الدىنداعى جاۋاپكەرشىلىك الاتىنىنا كەپىلدىك بەرەتىنىن ايتتى. سونداي-اق ازاماتتار مەن باسقا دا قۇقىق سۋبەكتىلەرىنە قۇقىقتارى بۇزىلعان جاعدايدا تىكەلەي قورعاۋعا مۇمكىندىك بەرەتىنىن جەتكىزدى.
زاڭگەر الماس جۇماعاليدىڭ ايتۋىنشا، قازاقستان رەسپۋبليكاسىنىڭ قۇقىقتىق جۇيەسىن جەتىلدىرۋ ماسەلەسىنە كەلگەندە وزگەرىستەردى الدىمەن كونستيتۋتسيادان باستاۋ كەرەك.
«ساياسي رەفورمانىڭ ەڭ باستىسى – كونستيتۋتسياعا وزگەرىس ەنگىزۋ. تىپتەن جاڭا كونستيتۋتسيا قابىلداۋ قاجەت. پرەزيدەنتتىڭ 16 ناۋرىزداعى «جاڭا قازاقستان: جاڭارۋ مەن جاڭعىرۋ جولى» جولداۋىندا ايتقان شەشىمدەرى، باستاماسى دۇرىس. بىراق ءسوز كۇيىندە قالماي، جۇمىس توبى تەز ارادا وزگەرىستەردى كونستيتۋتسيالىق زاڭداردان باستاپ ەنگىزۋى كەرەك. كونستيتۋتسيالىق سوتتىڭ قايتا قالىپقا كەلۋى وتە دۇرىس. سوندا حالىق ويىن اشىق ايتا الادى. سونىمەن قاتار ەلىمىزدە ماجوريتارلىق جانە پروپورتسيونالدى سايلاۋ جۇيەلەرى قاتار بولۋى كەرەك. پرەزيدەنت ماجوريتارلىق جۇيەنى 30 پايىز ەنگىزىپ جاتىر، بىراق تۇبىندە ەلۋدە ەلۋ بولۋى كەرەك دەگەن ۇسىنىس ايتىلدى», – دەدى سۋلەيمان دەميرەل اتىنداعى ۋنيۆەرسيتەتتىڭ اعا وقىتۋشىسى.
تالقىلاۋعا قاتىسقان زاڭگەرلەر قولدانىستاعى زاڭدى جەتىلدىرگەندە ءوز قۇقىقتارىن جۇزەگە اسىرۋدا كوپتەگەن قيىندىقتارعا تاپ بولىپ وتىرعان ازاماتتاردىڭ قۇقىقتارى مەن بوستاندىقتارى تۋرالى بلوكقا ەرەكشە نازار اۋدارۋ قاجەت ەكەنىن اتاپ ءوتتى.
«قۇقىق ۇستەمدىگى ينستيتۋتىنىڭ» ساراپشىسى، زاڭ عىلىمدارىنىڭ دوكتورى لەيلا جانۇزاقوۆا وبلىس اكىمدەرىن تىكەلەي سايلاۋ تۋرالى ۇسىنىسىن ايتتى.
«قوعام وبلىس اكىمدەرىن دە تىكەلەي سايلاۋدى تالاپ ەتەدى. پيلوتتىق جوبا رەتىندە قازاقستاننىڭ ءبىر وبلىسىندا سايلاۋ وتكىزۋ كەرەك. بىراق ۇمىتكەرلەر ساياسي پارتيالاردىڭ ۇسىنىسىمەن عانا ەمەس، قوعامدىق بىرلەستىكتەردىڭ دە قاتىسۋىمەن، سونداي-اق ءوزىن-ءوزى ۇسىنۋ ارقىلى دا قاتىسۋى ءتيىس. بۇل تىكەلەي دەموكراتيا ينستيتۋتىنىڭ قالاي جۇمىس ىستەيتىنىن كورۋ ءۇشىن قاجەت»، – دەدى پروفەسسور.
شارا سۋلەيمان دەميرەل اتىنداعى ۋنيۆەرسيتەت پەن «قۇقىق ۇستەمدىگى ينستيتۋتى» ۇيىمىنىڭ ۇيىمداستىرۋىمەن ءوتتى.
“ادىرنا” ۇلتتىق پورتالى
