سەيسمولوگتەر ەسكەرتەدى: الماتىدا الدىعى اپتادا 3-3,5 بالدىق جەر سىلكىنىسى بولۋى مۇمكىن

2634
Adyrna.kz Telegram

ۇلتتىق سەيسميكالىق بولجاۋ كوميسسياسى كەزەكتەن تىس القاسوز جۇرگىزدى. وتىرىس بارىسىندا ەلىمىزدە بولۋى مۇمكىن جەر دۇمپۋلەرىنىڭ شاما-شارقى تالقىلاندى. كەلەسى اپتادا الماتى قالاسىندا توپىراق تولقۋى مۇمكىن، دەپ حابارلايدى "ادىرنا" ۇلتتىق پورتالى seismology.kz-كە سىلتەمە كورسەتە وتىرىپ. 

بريفينگتە سەيسمولوگيا ينستيتۋتىنىڭ ديرەكتورى داۋلەت سارسەنباەۆ الماتى قالاسى، الماتى جانە جەتىسۋ وبلىستارى اۋماعىندا الداعى اپتاداعى جەر سىلكىنىسىنە قاتىستى بولجاۋ كوميسسياسىنىڭ قورىتىندىسىن مالىمدەدى.

«الماتى پوليگونى اۋماعىنداعى جەر سىلكىنىسىنىڭ ورتاشا مەرزىمدى بولجامى بويىنشا قورىتىندىسى ازىردەندى. وسى قورىتىندىعا سايكەس، 2023 جىل ىشىندە الماتى پوليگونى اۋماعىندا 0,7 ىقتيمالدىعىمەن ماگنيتۋداسى 5,6, ياعني جەتى بالدىق جەر سىلكىنىسى كۇتىلمەيدى. الداعى اپتادا شامامەن 3-3,5 باللدى قۇرايتىن جەر دۇمپۋلەرى بولۋى ىقتيمال. بۇل ءبىزدىڭ ايماققا ءتان قالىپتى سەيسمولوگيالىق فوندىق رەجيم»، – دەپ اتاپ ءوتتى.

قازىرگى ۋاقىتتا الماتى بولجاۋ پوليگونىنىڭ اۋماعىندا (الماتى ق.، الماتى جانە جەتىسۋ وبلىستارى) 47 ستانتسيا جۇمىس ىستەيدى. ينستيتۋت بازاسىندا تۇراقتى بولجاۋ كوميسسياسى جۇمىس ىستەيدى، ونىڭ قۇرامىنا ءتورت عىلىمي زەرتحانانىڭ قىزمەتكەرلەرى مەن سەيسمولوگيالىق تاجىريبەلىك-ادىستەمەلىك ەكسپەديتسيانىڭ (ستاە) قىزمەتكەرلەرى كىرەدى. رەجيمدىك باقىلاۋدىڭ كەشەندى ستانتسيالارى جەلىسىنەن كۇن سايىن الىناتىن سەيسمولوگيالىق، گەوفيزيكالىق، گيدروگەوديناميكالىق، گەوحيميالىق جانە باسقا دا دەرەكتەرگە (200 پارامەترگە دەيىن) تۇراقتى مونيتورينگ جۇرگىزىلەدى.

"ادىرنا" ۇلتتىق پورتالى 

پىكىرلەر