Almaty polisiiasy jer sılkınısı turaly jalǧan aqparat taratuşylardy ızdestırude, dep habarlaidy “Adyrna” ūlttyq portaly.
Qūqyq qorǧau organdary keşe tünde qoǧamda negızsız dürbeleŋ men ürei tudyrǧan jalǧan habarlardyŋ avtorlaryn anyqtap jatqanyn aitty. «Jalǧan aqparat taratqany üşın qylmystyq jauapkerşılık qarastyrylǧan», - dep eskertedı polisiia departamentı. Qylmystyq kodekstıŋ 274-baby «Būqaralyq aqparat qūraldaryn, telekommunikasiia jelılerın jäne onlain platformalardy paidalana otyryp, körıneu jalǧan aqparat taratu» baby boiynşa jaza 3 myŋ AEK (11 million teŋge) mölşerınde aiyppūl salu nemese sol mölşerde tüzeu jūmystary, ne segız jüz saǧatqa deiıngı merzımge qoǧamdyq jūmystarǧa tartu nemese üş jylǧa deiın bas bostandyǧynan aiyru boluy mümkın. Būǧan deiın tärtıp saqşylary azamattardy tek resmi aqparat közderınen alynǧan aqparatqa senuge şaqyrdy. Aita ketsek, chattarda Äl-Farabi daŋǧylyndaǧy ekı köpqabatty üidıŋ qūlaǧany turaly jalǧan habarlama taraǧan bolatyn. Alaida Tötenşe jaǧdailar qyzmetı zardap şekkender men qiraular joq ekenın aityp, aqparatty joqqa şyǧardy. Sondai-aq almatylyqtardyŋ chattarynda eŋ köp taraǧan habarlama taŋǧy beste taǧy da jer sılkınısı bolady degen belgısız er adamnyŋ audiosy boldy. Alaida Tötenşe jaǧdailar departamentınıŋ basşysy Nūrlan Atyǧaev joiqyn jer sılkınısı turaly aqparat jalǧan dep sendırdı. Sonymen qatar QazŪU-dyŋ №6 jäne №8 jataqhanalarynyŋ qiraǧany turaly da jalǧan aqparat tarap ülgerdı. Alaida Ǧylym jäne joǧary bılım ministrlıgı būl aqparatty joqqa şyǧardy.“Adyrna” ūlttyq portaly
Ūqsas jaŋalyqtar
