14 قاڭتارداعى سوڭعى مالىمەت بويىنشا، ماڭعىستاۋ وبلىسىندا 988 ءولى اققۋ تابىلعان. بۇل تۋرالى اۋماقتىق ورمان شارۋاشىلىعى جانە جانۋارلار دۇنيەسى ينسپەكتسياسىنىڭ باسشىسى عابباس دوساتوۆ مالىمدەدى، دەپ حابارلايدى “ادىرنا” ۇلتتىق پورتالى Lada.kz سايتىنا سىلتەمە جاساپ.
“قاراكول كولىنەن 968 ءولى اققۋ تابىلدى. سونداي-اق قاراقيان ايماعىنداعى تەڭىز جاعاسىنان 20 ءولى قۇس تابىلدى. 14 قاڭتارداعى مالىمەت بويىنشا ولگەن قۇستاردىڭ سانى 988 باسقا جەتتى”، - دەيدى ينسپەكتسيا باسشىسى عابباس دوساتوۆ.
قاراقيان اۋدانىنىڭ اكىمدىگى قۇرىق اۋىلى ماڭىنداعى تەڭىز جاعاسىنان ولگەن 20 اققۋدىڭ ولەكسەسى تابىلعانىن راستادى. اۋدان اكىمىنىڭ ورىنباسارى اسان چۋكين تۇرعىنداردىڭ تەڭىز جاعاسىنا شىعۋىنا ۋاقىتشا شەكتەۋلەر ەنگىزىلگەنىن ايتتى.
ەسكە سالايىق، اققۋلاردىڭ ءولىمى تۋرالى العاش رەت وتكەن جىلدىڭ جەلتوقسان ايىنىڭ سوڭىندا ءسوز بولعان. زەرتتەي كەلە، عالىمدار ءولىمنىڭ سەبەبى قۇس تۇماۋى دەگەن قورىتىندىعا كەلدى. الايدا، كەيىنىرەك ساراپشىلار تۇماۋ ۆيرۋسىنىڭ قايتالاما سيپاتقا يە ەكەندىگىن جانە جاپپاي ءولىمنىڭ نەگىزگى سەبەبى ازىقتىڭ جەتىسپەۋى مەن سۋىقتىڭ اسەرى دەگەن بولجام جاسادى.
9 قاڭتاردا ەكولوگتار Rixos قوناقۇيىنەن شىعىپ جاتقان وعاش سۋ اعىندىلارىن زەرتتەپ جاتقانى تۋرالى اقپارات پايدا بولدى. كۆادروكوپتەردەن تۇسىرىلگەن ۆيدەودا قازىر قۇستار قىرىلىپ جاتقان قاراكول كولىنە قارا سۋدىڭ تىكەلەي اعىپ جاتقانىن كورۋگە بولادى.
Rixos Water World Aktau قوناقۇيىنىڭ باس مەنەدجەرى سەرىك يساعاليەۆ قوناقۇيدەن تازارتىلعان اعىندى سۋدىڭ قاراكول كولىنە اعىپ جاتقانىن راستادى. قوناقۇي سالۋ كەزىندە ورتالىق كارىز جۇيەسىنىڭ بولماۋىنا بايلانىستى، اعىندى سۋلاردى تازارتۋ جانە كولگە اعىزۋ جوباسى ماقۇلدانعان.
ول قوناقۇيدە بارلىق قاجەتتى رۇقسات قۇجاتتارى بار ەكەنىن جانە "Rixos Water World Aktau" قاراكولدەگى تراگەديانى وبەكتيۆتى تەرگەۋگە مۇددەلى ەكەنىن اتاپ ءوتتى.
وسى ىسكە قاتىستى «تابيعات» رەسپۋبليكالىق اڭشىلار قاۋىمداستىعىنىڭ ۆيتسە-پرەزيدەنتى ايتۋار تۋعانبەكوۆ Rixos قوناقۇيىنەن تازارتىلعان سۋدى قاراكول كولىنە اعىزۋ جوباسىنا ءۇزىلدى-كەسىلدى قارسى ەكەنىن جەتكىزدى.
”ادىرنا” ۇلتتىق پورتالى
