سقو-نىڭ 7 اۋدانىندا قۇس تۇماۋى تىركەلدى

1484

سولتۇستىك قازاقستان وبلىسىنىڭ 7 اۋدانىندا قۇس تۇماۋىنىڭ وشاقتارى تابىلدى، - دەپ حابارلايدى Adyrna.kz سايتى اۋىل شارۋاشىلىعى مينيسترلىگىنە سىلتەمە جاساپ.

مينيسترلىك مالىمەتىنشە، سقو-دا جوعارى پاتوگەندى قۇس تۇماۋىنىڭ تارالۋىنا جول بەرمەۋ ماقساتىندا كەشەندى شارالار قابىلدانىپ جاتىر: ۆاكتسينالار الىندى، ىندەت تىركەلگەن اۋماقتار زالالسىزداندىرىلۋدا، قۇستاردىڭ ولەكسەلەرى جويىلۋدا، قۇس شارۋاشىلىعى ونىمدەرىن تاسىمالداۋعا تىيىم سالىندى.

"سولتۇستىك قازاقستان وبلىسىنىڭ جەتى اۋدانىندا (تيميريازەۆ، تايىنشا، جامبىل، قىزىلجار، شال اقىن، ع.مۇسىرەپوۆ، م.جۇماباەۆ) اعىمداعى جىلدىڭ 9-16 قىركۇيەك ارالىعىندا ءارتۇرلى ءۇي قۇستارىنىڭ ءولىمى تىركەلدى.

ۇلتتىق انىقتامالىق ورتالىق قاناتتىلاردىڭ قىرىلۋىنىڭ سەبەبى جوعارى پاتوگەندى قۇس تۇماۋى ەكەنىن انىقتادى. قابىلدانعان ەرەجەلەرگە سايكەس، قازاقستان رەسپۋبليكاسى دۇنيەجۇزىلىك جانۋارلار دەنساۋلىعىن ساقتاۋ ۇيىمىنا اۋرۋدىڭ ءورشۋى تۋرالى حابارلادى", - دەلىنگەن حابارلامادا.

"اسا قاۋىپتى اۋرۋدى جويۋ ءۇشىن قر اشم ۆەتەريناريالىق باقىلاۋ جانە قاداعالاۋ كوميتەتىنىڭ رەسپۋبليكالىق ەپيزووتياعا قارسى وتريادى جانە سولتۇستىك قازاقستان اۋماقتىق ينسپەكتسياسى قازىرگى ۋاقىتتا مىندەتتى ءىس-شارالار كەشەنىن، ونىڭ ىشىندە قۇستاردىڭ ولەكسەلەرىن جويۋ، ءۇي-جايلار مەن اۋلا اۋماقتاردى دەزينفەكتسيالاۋ جۇمىستارىن جۇرگىزۋدە. رەسەي فەدەراتسياسىمەن شەكارالاس اۋماقتاردا جانۋارلاردى ۆاكتسيناتسيالاۋ ءۇشىن جوعارى پاتوگەندى قۇس تۇماۋىنا قارسى 873 مىڭ وتاندىق پرەپارات ءبولىندى", - دەيدى مينيسترلىكتەگىلەر.

مينيسترلىك مالىمەتىنشە، ءوڭىردىڭ ەپيزووتيالىق جاعدايى اۋىل شارۋاشىلىعى مينيسترلىگىنىڭ باقىلاۋىندا.

"ادىرنا" ۇلتتىق پورتالى

پىكىرلەر
رەداكتسيا تاڭداۋى