تالدىقورعان قالاسىنداعى نازارباەۆ زياتكەرلىك مەكتەبىنىڭ ماتەماتيكا ءپانىنىڭ مۇعالىمى مەرەي كاكەن رەسپۋبليكالىق «پەداگوگيكالىق يدەيالار فەستيۆالى» بايقاۋىنىڭ جۇلدەگەرى اتاندى.
بايقاۋ الماتىداعى سۇلەيمەن دەميرەل اتىنداعى ۋنيۆەرسيتەتتە «دارىن» رەسپۋبليكالىق عىلىمي-پراكتيكالىق ورتالىعىنىڭ ۇيىمداستىرۋىمەن ءوتتى.
ەلىمىزدىڭ تۇكپىر-تۇكپىرىنەن كەلگەن 100-دەن استام ۇزدىك مۇعالىمدەر وزدەرىنىڭ زەرتتەۋلەرىن ۇسىندى.
ماتەماتيكا ءپانىنىڭ مۇعالىمى مەرەي كاكەن ۇستازدار قاۋىمىنا ماتەماتيكادان ءبىلىم بەرەتىن ۆەب-سايتتى ۇسىندى. 224.kz - ءوزىن-ءوزى وقىتۋ الاڭىنىڭ اتاۋى.
2020 جىلدىڭ كوكتەمىندە كەڭىنەن بەلەڭ العان پاندەميا بۇكىل الەمنىڭ ءبىلىم بەرۋ جۇيەسى ءۇشىن اۋىر سىناققا اينالدى. مەكتەپ وقۋشىلارى قاشىقتان وقۋعا ءماجبۇر بولدى. ءدال سول كەزدە ۇستازدىڭ ويىنا تەك ۆەب-سايت قانا ەمەس، YouTube- ارنا قۇرۋ يدەياسى كەلدى.
ۇستاز جاساعان IT ونىمدەرى تالدىقورعاندىق وقۋشىلارعا عانا ەمەس، ەلىمىزدىڭ بارلىق وقۋشىلارىنىڭ «ماتەماتيكا» ءپانىن مەڭگەرۋدەگى اسسيستەنتى ءارى تانىمال ءبىلىم بەرۋ الاڭدارىنىڭ بىرىنە اينالدى. مەرەي اعايعا 8 مىڭنان استام ادام جازىلىپ، بەينەروليكتەر 733 مىڭنان استام رەت قارالعان.
جوبا پەداگوگيكالىق يدەيالار بايقاۋىندا ەكىنشى ورىنعا يە بولدى.
— بۇل سايت وقۋشىلاردىڭ ماتەماتيكالىق ءبىلىمىن كوتەرۋ ءۇشىن قۇراستىرىلدى. وقۋشىلار كەز كەلگەن ۋاقىتتا وزىنە كەرەكتى تاقىرىپتار بويىنشا جەكە جۇمىس جاساي الادى. وقۋشىلاردىڭ تاقىرىپتاردى ىزدەۋىنە قولايلى بولۋ ءۇشىن ۆيدەو ساباقتار سىنىپ جانە ءبولىم بويىنشا جيناقتالدى. ءاربىر تاقىرىپقا سايكەس تەوريالىق ۆيدەو، وقۋشىلار ورىندايتىن جاتتىعۋلار جانە ءوزىن-ءوزى تەكسەرۋگە ارنالعان تەست سۇراقتارى بار، — دەيدى مەرەي كاكەن.
بايقاۋ ۇيىمداستىرۋشىلاردىڭ ايتۋىنشا، پەداگوگيكالىق يدەيالار فەستيۆالى قازىلار القاسىمەن، باسقا مۇعالىمدەرمەن كاسىبي دەڭگەيدە قارىم-قاتىناس ورناتۋعا مۇمكىندىك بەرەدى. ويتكەنى، زاماناۋي مۇعالىمدەر وزگەرمەلى جاعدايلارعا ۇنەمى بەيىمدەلۋى كەرەك. مۇنىڭ ءبارى مۇعالىمنەن ۇنەمى تۇلعالىق جانە كاسىبي ءوزىن-ءوزى دامىتۋدى تالاپ ەتەدى. ال مۇعالىم تۇلعاسىنىڭ اجىراماس قۇرامداس بولىگى – شىعارماشىلىق. شىعارماشىل مۇعالىم – بالاعا ءوزىن-ءوزى جۇزەگە اسىرۋدىڭ وزىندىك جولىن تابۋعا كومەكتەسەتىن، تاۋەلسىز جانە وزىنە سەنىمدى تۇلعا بولىپ قالىپتاسۋىنا كومەكتەسەتىن زەرتتەۋشى.
