Taldyqorǵan qalasyndaǵy Nazarbaev Zııatkerlik mektebiniń matematıka pániniń muǵalimi Mereı Káken Respýblıkalyq «Pedagogıkalyq ıdeıalar festıvali» baıqaýynyń júldegeri atandy.
Baıqaý Almatydaǵy Súleımen Demırel atyndaǵy ýnıversıtette «Daryn» respýblıkalyq ǵylymı-praktıkalyq ortalyǵynyń uıymdastyrýymen ótti.
Elimizdiń túkpir-túkpirinen kelgen 100-den astam úzdik muǵalimder ózderiniń zertteýlerin usyndy.
Matematıka pániniń muǵalimi Mereı Káken ustazdar qaýymyna matematıkadan bilim beretin veb-saıtty usyndy. 224.kz - ózin-ózi oqytý alańynyń ataýy.
2020 jyldyń kókteminde keńinen beleń alǵan pandemııa búkil álemniń bilim berý júıesi úshin aýyr synaqqa aınaldy. Mektep oqýshylary qashyqtan oqýǵa májbúr boldy. Dál sol kezde ustazdyń oıyna tek veb-saıt qana emes, YouTube- arna qurý ıdeıasy keldi.
Ustaz jasaǵan IT ónimderi taldyqorǵandyq oqýshylarǵa ǵana emes, elimizdiń barlyq oqýshylarynyń «matematıka» pánin meńgerýdegi assıstenti ári tanymal bilim berý alańdarynyń birine aınaldy. Mereı aǵaıǵa 8 myńnan astam adam jazylyp, beınerolıkter 733 myńnan astam ret qaralǵan.
Joba pedagogıkalyq ıdeıalar baıqaýynda ekinshi orynǵa ıe boldy.
— Bul saıt oqýshylardyń matematıkalyq bilimin kóterý úshin qurastyryldy. Oqýshylar kez kelgen ýaqytta ózine kerekti taqyryptar boıynsha jeke jumys jasaı alady. Oqýshylardyń taqyryptardy izdeýine qolaıly bolý úshin vıdeo sabaqtar synyp jáne bólim boıynsha jınaqtaldy. Árbir taqyrypqa sáıkes teorııalyq vıdeo, oqýshylar oryndaıtyn jattyǵýlar jáne ózin-ózi tekserýge arnalǵan test suraqtary bar, — deıdi Mereı Káken.
Baıqaý uıymdastyrýshylardyń aıtýynsha, pedagogıkalyq ıdeıalar festıvali qazylar alqasymen, basqa muǵalimdermen kásibı deńgeıde qarym-qatynas ornatýǵa múmkindik beredi. Óıtkeni, zamanaýı muǵalimder ózgermeli jaǵdaılarǵa únemi beıimdelýi kerek. Munyń bári muǵalimnen únemi tulǵalyq jáne kásibı ózin-ózi damytýdy talap etedi. Al muǵalim tulǵasynyń ajyramas quramdas bóligi – shyǵarmashylyq. Shyǵarmashyl muǵalim – balaǵa ózin-ózi júzege asyrýdyń ózindik jolyn tabýǵa kómektesetin, táýelsiz jáne ózine senimdi tulǵa bolyp qalyptasýyna kómektesetin zertteýshi.
