ءبىر ايدان استام ۋاقىت بويى ەرەۋىلگە شىققان West Oil Softwar مۇناي سەرۆيستىك كومپانياسىنىڭ جۇزدەگەن قىزمەتكەرلەرى ەرەۋىلگە قاتىسۋشىلارعا قىسىمدى توقتاتۋدى تالاپ ەتۋدە, دەپ حابارلايدى "ادىرنا" ءتىلشىسى "ازاتتىق راديوسىنا" سىلتەمە جاساپ.
كومپانيا قىزمەتكەرلەرى ەرەۋىلگە شىققان ارىپتەستەرىنە قىسىم كورسەتىلىپ جاتقانىن ايتىپ، قازاقستان پرەزيدەنتى قاسىم-جومارت توقاەۆقا ۇندەۋ جاسادى.
13 قاڭتاردا جاريالانعان ۇندەۋدە ەرەۋىلگە قاتىسۋشىلار جۇمىستان شىعارىلعان 7 ادام پوليتسياعا شاقىرىلعانىن ايتقان. ولاردىڭ ايتۋىنشا، قىزمەتكەرلەر قىلمىستىق كودەكستىڭ 402-بابى بويىنشا قوزعالعان ىستە كۋاگەر رەتىندە شاقىرىلعان.
"500-دەن استام ازاماتتىق داۋىس ەسەپتەلمەيدى جانە بىزگە تەك قىسىم جاسالادى. بۇل زايىرلى دەموكراتيالىق مەملەكەتتىڭ پرينتسيپتەرىنە قايشى كەلمەي مە؟ ءبىز ەرەۋىلگە قاتىسۋشىلاردىڭ قۇقىقتارىن قۇرمەتتەۋدى تالاپ ەتەمىز", - دەيدى جۇمىسشىلار.
West Oil Softwar مۇناي سەرۆيستىك كومپانياسىنىڭ جۇمىسشىلارى 2023 جىلعى 11 جەلتوقساننان باستاپ جۇمىستى تولىعىمەن توقتاتقان. جۇمىسشىلار اتالعان مەكەمەنىڭ وندىرىستەگى ماتەريالدىق تەحنيكالىق بازاسىن جاڭارتۋدى سۇراپ، مەكەمە قىزمەتكەرلەرىنىڭ «كازمۇنايگاز» ۇق اق قوسۋ، ەڭبەك اقى تولەۋدىڭ بىرىڭعاي جۇيەسىنىڭ تاريفىمەن تەڭەستىرۋ تالاپتارىن ايتىپ، ەرەۋىلگە شىققان بولاتىن.
دەگەنمەن، جالاقى ماسەلەسىن داۋلاعان قىزمەتكەرلەر «West Oil Software» جشس-ءنىڭ باسشىلىعىنا ەرەۋىلگە شىعاتىنى جايلى حابار بەرمەگەن.
قاراقيا اۋداندىق سوتىنا تالاپ قويۋشى ««West Oil Software» جشس-ءى جۇمىسكەرلەردىڭ ەرەۋىلىن زاڭسىز دەپ تانۋ تۋرالى تالاپ قويۋمەن جۇگىنگەن. سەبەبى قىزمەتكەرلەر تاراپىنان ەرەۋىل وتكىزۋ ۇزاقتىعى جانە ورىندالاتىن قاجەتتى جۇمىستاردىڭ ەڭ از كولەمى جونىندە ۇسىنىستار كورسەتىلمەگەن.
ال سوت «West Oil Software» جشس-ءنىڭ تالاپ قويۋى قاناعاتتاندىرىلىپ، جۇمىسكەرلەردىڭ ەرەۋىلى زاڭسىز دەپ تانىلدى.
