سي تسزينپين: قازاقستان مەن قحر قارىم-قاتىناسىنىڭ الداعى 30 جىلداعى التىن ءداۋىرى باستالدى

3838
Adyrna.kz Telegram

قحر توراعاسى سي تسزينپين بەيجىڭدە مەملەكەت باسشىسى قاسىم-جومارت توقاەۆپەن كەزدەسۋىندە قازاقستان مەن قىتاي قارىم-قاتىناسىنىڭ جاڭا التىن 30 جىلدىعى باستالعانىن مالىمدەدى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.

بەيجىڭ قالاسىنداعى حالىق جينالىسى ۇيىندە قازاقستان پرەزيدەنتى قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي تسزينپين كەلىسسوز جۇرگىزدى.

ءوزارا سەنىم مەن دوستىققا نەگىزدەلگەن كەزدەسۋدە كوشباسشىلار قازاقستان مەن قىتاي اراسىنداعى جان-جاقتى ستراتەگيالىق سەرىكتەستىكتىڭ، سونىڭ ىشىندە ساياسي، ساۋدا-ەكونوميكالىق، كولىك-ترانزيتتىك جانە مادەني-گۋمانيتارلىق سالالاردىڭ اۋقىمدى ماسەلەلەرىن تالقىلادى.

قازاقستان پرەزيدەنتى قىتاي توراعاسىنا ءىلتيپات ءبىلدىرىپ، قىسقى وليمپيادا ويىندارىنىڭ سالتاناتتى اشىلۋ ءراسىمى كەرەمەت ۇيىمداستىرىلعانىن اتاپ ءوتتى.

– بەيجىڭدەگى وليمپيادا ويىندارى بۇكىل ادامزات ءۇشىن جاۋاپتى ساتتە ءوتىپ جاتىر. بۇل سپورت سايىستارى جاڭارۋعا ۇندەپ، پاندەميانىڭ سىن-قاتەرلەرىن ەڭسەرۋگە ۇلەس قوسادى. سوندىقتان  ءسىزدىڭ شاقىرۋىڭىزدى زور قۋانىشپەن قابىل الدىم، – دەدى مەملەكەت باسشىسى.

پرەزيدەنت ەلىمىزدەگى جاعدايدى تۇراقتاندىرۋعا باعىتتالعان كۇش-جىگەرىنە بەرىك دوستىق نيەتىن بىلدىرگەنى، سونداي-اق جاڭا قازاقستان قۇرۋ جولىندا قاجەتتى كومەك كورسەتۋگە دايىندىعى ءۇشىن قىتاي توراعاسىنا ريزاشىلىعىن جەتكىزدى.

سونىمەن قاتار قاسىم-جومارت توقاەۆ سي ءتسزينپيننىڭ ءتيىمدى باسشىلىعىمەن قول جەتكىزگەن قىتاي ەكونوميكاسىنىڭ دامۋ جەتىستىكتەرىنە جوعارى باعا بەردى.

پرەزيدەنت ديپلوماتيالىق قاتىناستار ورناعان 30 جىل ىشىندەگى قازاق-قىتاي قاتىناستارىنىڭ دامۋى تۋرالى ايتا كەلە، ەكى ەلدىڭ كۇش بىرىكتىرە وتىرىپ، بارلىق سالاداعى ستراتەگيالىق سەرىكتەستىكتىڭ بەرىك ىرگەتاسىن قالاعانىنا نازار اۋداردى. ونىڭ پىكىرىنشە، بۇل ىنتىماقتاستىق ماڭگى، جان-جاقتى جانە ساياسي كونيۋنكتۋراعا باعىنىشتى ەمەس.

قازاقستان پرەزيدەنتى بۇگىنگى كەلىسسوزدىڭ قازاق-قىتاي قارىم-قاتىناسى تاريحىنداعى ساپالى ءارى جاڭا كەزەڭگە بىرلەسە قادام باسۋعا مۇمكىندىك بەرەتىنىن اتاپ ءوتتى.

قاسىم-جومارت توقاەۆ قازاق-قىتاي دوستىعىن، تاتۋ كورشىلىك پەن ءوزارا سىيلاستىقتى نىعايتۋدا جاڭا تابىستارعا قول جەتكىزۋ ءۇشىن تىعىز ىنتىماقتاستىققا ءازىر ەكەنىن اتاپ ءوتىپ، سي ءتسزينپيندى بيىلعى قىركۇيەكتە قازاقستانعا مەملەكەتتىك ساپارمەن كەلۋگە شاقىردى.

مەملەكەت باسشىسىنىڭ پىكىرىنشە، قحر توراعاسىنىڭ ساپارى ەكى ەل اراسىنداعى ستراتەگيالىق سەرىكتەستىككە تىڭ سەرپىن بەرەدى.

كەلىسسوز بارىسىندا ساۋدا-ەكونوميكالىق بايلانىستاردى ارتتىرۋداعى بىرلەسكەن ءىس-قيمىلعا ەرەكشە نازار اۋدارىلدى. پرەزيدەنت پاندەمياعا قاراماستان، ەكىجاقتى تاۋار اينالىمى 2021 جىلدىڭ قورىتىندىسى بويىنشا 15,2 پايىزعا ءوسىپ، 18,2 ميلليارد دوللارعا جەتكەنىن اتاپ ءوتتى. قىتاي مەن ورتالىق ازيانىڭ بەس ەلى اراسىنداعى جالپى ساۋدانىڭ جارتىسى قازاقستانعا تيەسىلى.

سونىمەن قاتار قاسىم-جومارت توقاەۆ «ءبىر بەلدەۋ - ءبىر جول» باستاماسىن ودان ءارى ىسكە اسىرۋ جونىندەگى باسىم مىندەتتى اتادى. مەملەكەت باسشىسى ەلىمىزدىڭ تسيفرلىق تەحنولوگيالار مەن كولىك جانە لوگيستيكا سالالارىنداعى ىنتىماقتاستىقتى نىعايتۋعا مۇددەلى ەكەنىنە توقتالدى.

كەلىسسوز بارىسىندا تۋريزم جانە مادەني-گۋمانيتارلىق بايلانىستار سالاسىنداعى ىنتىماقتاستىقتى دامىتۋدىڭ پەرسپەكتيۆاسى، سونداي-اق قازاقستاندا قىتاي مادەني ورتالىعىن اشۋ ماسەلەسى تالقىلاندى.

قحر توراعاسى «ءبىرتۇتاس قىتاي» قاعيداتىنا قولداۋ كورسەتكەنى ءۇشىن قاسىم-جومارت توقاەۆقا العىس ايتىپ، ستراتەگيالىق ىنتىماقتاستىقتى ودان ءارى جان-جاقتى دامىتۋعا مۇددەلى ەكەنىنە سەنىم ءبىلدىردى.

سي تسزينپين قازاقستان مەن قحر اراسىنداعى بايلانىستاردىڭ الداعى 30 جىلداعى التىن داۋىرىنە وسى كەزدەسۋ جول اشاتىنىن اتاپ ءوتتى.

قحر توراعاسى «ءبىر بەلدەۋ - ءبىر جول» باستاماسى جۇزەگە اسىرىلىپ جاتقان 9 جىل ىشىندەگى وڭ ىنتىماقتاستىقتى اتاپ ءوتتى. سونداي-اق سي تسزينپين اۋىل شارۋاشىلىعى، جاسىل ەنەرگەتيكا، جاساندى ينتەللەكت، قارجى جانە ەلەكتروندى ساۋدا سالالارىنداعى ءوزارا ىقپالداستىقتىڭ كەلەشەگىنە دە باسا ءمان بەردى.

قىتاي باسشىسى سي تسزينپين قاسىم-جومارت توقاەۆتىڭ پاراساتتى ءارى كورەگەن باسشىلىعىمەن قازاقستاننىڭ قۋاتتى ءارى وركەندەگەن مەملەكەتكە اينالاتىنىنا سەنىم ءبىلدىردى. سونداي-اق ول ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ جۇمىسىنا جانە ونىڭ وڭىرلىك قاۋىپسىزدىكتى قامتاماسىز ەتۋ جونىندەگى باستامالارىنا جوعارى باعا بەردى.

كەزدەسۋ سوڭىندا سي تسزينپين قاسىم-جومارت توقاەۆتىڭ قازاقستانعا شاقىرۋىن قابىل الىپ، الداعى كۇزدە ەلىمىزگە مەملەكەتتىك ساپارمەن كەلۋ جونىندەگى جوسپارىمەن ءبولىستى.

سونىمەن قاتار سي تسزينپين قاسىم-جومارت توقاەۆپەن تۇراقتى بايلانىس جاساپ تۇرۋعا دايىن ەكەنىن جەتكىزدى.

پىكىرلەر