بۇگىن اقوردادا قازاقستان-وزبەكستان جوعارى مەملەكەتارالىق كەڭەسىنىڭ ءبىرىنشى وتىرىسى وتكىزىلۋدە، دەپ حابارلايدى “ادىرنا” ۇلتتىق پورتالى.
وتىرىسقا پرەششيدەنت قاسىم-جومارت توقاەۆ پەن وزبەكستان پرەزيدەنتى شاۆكات ميرزيوەۆ قاتىسۋدا. اۋەلى ءسوز العان توقاەۆ شاقىرۋدى قابىل الىپ، قازاقستانعا مەملەكەتتىك ساپارمەن كەلگەنى ءۇشىن پرەزيدەنت شاۆكات ميرزيوەۆكە شىنايى ريزاشىلىعىن ءبىلدىردى.
“تۋىسقان وزبەك حالقىنىڭ باسشىسىن قازاق جەرىندە قارسى الۋ ءبىز ءۇشىن ۇلكەن قۇرمەت، مارتەبە. وزبەكستان قازاق ەلىنە باۋىرلاس مەملەكەت، تاتۋ كورشى، ماڭىزدى ءارى سەنىمدى سەرىكتەس. حالىقتارىمىزدىڭ مىزعىماس دوستىعى ورتاق تاريحقا جانە قۇندىلىقتارعا نەگىزدەلگەن”، - دەدى وتىرىستى اشقان قازاقستان پرەزيدەنتى.
سونداي-اق، توقاەۆ قازاق-وزبەك قاتىناسى ستراتەگيالىق سەرىكتەستىك جانە وداستاستىق رۋحىندا تۇراقتى دامىپ كەلە جاتقانىن باسا ايتتى.
ء”بىز وزبەكستانمەن ىنتىماقتاستىقتى نىعايتا تۇسۋگە ايرىقشا كوڭىل بولەمىز. بىلتىر وداقتاستىق قاتىناستار تۋرالى تاريحي شارتقا قول قويدىق. بۇگىن الداعى 10 جىلعا ارنالعان ستراتەگيالىق ارىپتەستىكتى جانە وداستاستىقتى دامىتۋ باعدارلاماسىن بەكىتەمىز. وسى ماڭىزدى قادامدار ەكى ەلدىڭ بايلانىسىن دامىتۋعا ايرىقشا سەرپىن بەرەدى دەپ سەنەمىز”، - دەدى توقاەۆ.
ايتا كەتەيىك، وزبەكستان پرەزيدەنتى شاۆكات ميرزيوەۆ كەشە قازاقستانعا مەملەكەتتىك ساپارمەن كەلگەن. قاسىم-جومارت توقاەۆ قازاقستانعا مەملەكەتتىك ساپارمەن كەلگەن وزبەكستان پرەزيدەنتى شاۆكات ميرزيوەۆتى ەلوردا اۋەجايىندا قارسى الدى.
