تۇركمەناباتتا اقش-تاعى تۋىستارىنا ۇيلەنۋ تويىنداعى سۋرەتتەرى مەن بەينەجازبالارىن جىبەرمەكشى بولعان جەرگىلىكتى تۇرعىندار ۇستالدى، دەپ حابارلايدى «ادىرنا» ءتىلشىسى.
27 جەلتوقساندا ەكى كەلىنشەك شەتەلدە تۇراتىن تۋىستارىمەن سويلەسىپ، ۇيلەنۋ تويىنداعى ەستەلىكتەردى جىبەرۋ ءۇشىن ينتەرنەت-كافەگە كەلگەن.
تۋىستارىمەن اڭگىمەلەسۋ بارىسىندا ولارعا پوليتسيا قىزمەتكەرلەرى جولىعىپ، ايەلدەردى گۋربانسولتان-ەجە شاعىن اۋدانىندا ورنالاسقان قالالىق پوليتسيا بولىمشەسىنە جەتكىزكەن. ولاردىڭ ۇيالى تەلەفوندارى تەكسەرىلىپ، قىسقا جاۋاپ الۋدان كەيىن 31 جەلتوقسان كۇنى تۇسكە دەيىن ۇستاۋ كامەراسىنا قامالعان. پوليتسيا اقش-تا قانداي تۋىستارى تۇراتىنىن، ولاردان قالاي كەتكەنىن، ەگەر تۋىستارىمەن سويلەسىپ، تويدى كورگىسى كەلسە، تۇرىكمەنستانعا نەگە كەلمەگەنىن سۇراعان. جىلدىڭ سوڭعى كۇنى ۇستالعانداردان جازباشا تۇسىنىكتەمەلەر الىنىپ، بوساتىلعانىمەن، 2-7 قاڭتار ارالىعىندا قايتادان جاۋاپ الۋعا شاقىرىلاتىنى ەسكەرتىلگەن. الايدا ايەلدەردىڭ ۇيالى تەلەفوندارى قايتارىلماعان.
قاڭتاردىڭ 5-ءى كۇنى جاۋاپ الۋ كەزىندە ايەلدەردىڭ ءبىرى ەسىنەن تانىپ، پوليتسيا جەدەل جاردەم مەن جاۋاپ الىنعانداردىڭ اتا-اناسىن شاقىرۋعا ءماجبۇر بولعان. وسى وقيعادان كەيىن ايەلدەر بوساتىلىپ، ولاردىڭ تۋىستارىنا تەرگەۋ كەزىندە جينالعان دەرەكتەر ءبىر جىل بويى ساقتالاتىنى جانە وسى ۋاقىت ىشىندە كەلىنشەكتەردىڭ بىرەۋى تۇرىكمەنستاننان تىس جەردە ورنالاسقان تۋىستارىمەن نەمەسە دوستارىمەن بايلانىسقان جاعدايدا قىلمىستىق ءىس قوزعالاتىنىن جەتكىزگەن.
ايتا كەتەيىك، تۇرىكمەنستان بيلىگى ەل تۇرعىندارىنىڭ شەتەلدە تۇراتىن ادامدارمەن مۇمكىندىگىنشە از بايلانىستا بولۋىن جانە شەتەلدىك اقپاراتتىق باسىلىمدارعا فوتو جانە بەينە ماتەريالداردى جىبەرمەۋىن قاداعالايدى.
