قىرعىزستان، تاجىكستان جانە وزبەكستان باسشىلارى سادىر جاپاروۆ، ەمومالي راحمون جانە شاۆكات ميرزيەەۆ لەۆ تولستوي اتىنداعى حالىقارالىق بەيبىتشىلىك سىيلىعىمەن ماراپاتتالدى، دەپ حابارلايدى «ادىرنا» ءتىلشىسى.
سىيلىق 2025 جىلى ورتالىق ازيا وڭىرىندە بەيبىتشىلىك پەن قاۋىپسىزدىكتى نىعايتۋعا قوسقان ەلەۋلى ۇلەس ءۇشىن بەرىلگەن.
ماراپاتتاۋ ءراسىمى 21 جەلتوقساندا سانكت-پەتەربۋرگتە وتكەن. ءىس-شارا بارىسىندا رەسەي پرەزيدەنتى ۆلاديمير پۋتين ارىپتەستەرىن قۇتتىقتاپ، ورتالىق ازياداعى بەيبىتشىلىك پەن تۇراقتىلىقتى نىعايتۋداعى ورتاق ەڭبەكتى جوعارى باعالادى.
ءوز كەزەگىندە ورتالىق ازيا ەلدەرىنىڭ باسشىلارى بىرلەسكەن جۇمىسىنا بەرىلگەن باعا ءۇشىن ۆلاديمير پۋتينگە العىس ءبىلدىرىپ، ءوزارا قۇرمەت پەن ىنتىماقتاستىقتىڭ ماڭىزىن اتاپ ءوتتى.
ەسكە سالايىق، 31 ناۋرىزدا قىرعىزستان، وزبەكستان جانە تاجىكستان پرەزيدەنتتەرى ءۇش ەلدىڭ شەكاراسى تۇيىسەتىن جەر تۋرالى كەلىسىم مەن ماڭگىلىك دوستىق تۋرالى حوجانت دەكلاراتسياسىنا قول قويعان ەدى.
