ەۋروپا ۋكرايناداعى قاقتىعىستى رەتتەۋ پروتسەسىن ادەيى تەجەپ، كيەۆتى اسكەري ارەكەتتەردى جالعاستىرۋعا يتەرمەلەپ وتىر. بۇل تۋرالى فەدەراتسيا كەڭەسىندە رەسەيدىڭ سىرتقى ىستەر ءمينيسترى سەرگەي لاۆروۆ مالىمدەدى، دەپ حابارلايدى «ادىرنا» ءتىلشىسى ينتەرفاكسقا سىلتەمە جاساپ.
ونىڭ ايتۋىنشا، سوڭعى كۇندەرى بولعان وقيعالار باتىستىڭ ءوز ىشىندە بىرلىك جوق ەكەنىن تاعى دا دالەلدەدى.
«جالپى العاندا تەندەنتسيا وزگەرگەن جوق. باتىس ءبىرتۇتاس ەمەس. بۇل سوڭعى كۇندەردەگى وقيعالارمەن تاعى دا ايقىندالدى. پرەزيدەنت ترامپ ءوزىنىڭ ءبىر سۇحباتىندا ەۋروپانىڭ ۋكرايناداعى جاعدايدى رەتتەۋ جونىندەگى ىقتيمال كەلىسىمدەردى ادەيى تەجەۋ ارەكەتتەرىن سىنعا الدى. بۇل كەلىسىمدەر سوعىستىڭ نەگىزگى سەبەپتەرىن جويىپ، قاقتىعىستى توقتاتۋعا مۇمكىندىك بەرەر ەدى. بىراق ەۋروپا بۇل پروتسەستى ادەيى تەجەپ، ۋكراين باسشىلىعىن سوعىستى سوڭعى ۋكراينالىق قالعانشا جالعاستىرۋعا يتەرمەلەۋدە»، – دەدى لاۆروۆ.
ءمينيستردىڭ سوزىنشە، ەۋروپا «مۇلدەم بولاشاعى جوق پوزيتسيانى» ۇستانىپ وتىر.
«اقش، سونىڭ ىشىندە پرەزيدەنت ترامپ، بارعان سايىن سابىرسىزدىق تانىتۋدا. ول بيىل قاڭتاردا اق ۇيگە كەلگەن ساتتەن باستاپ ۋكرايناداعى سوعىستىڭ سەبەپتەرىن تۇسىنۋگە تىرىسقان جالعىز باتىس كوشباسشىسى بولدى. بۇل – باتىستىڭ، سونىڭ ىشىندە بۇرىنعى پرەزيدەنت بايدەن مەن ونىڭ ەۋروپالىق سەرىكتەستەرىنىڭ جىلدار بويى رەسەيگە قارسى جۇرگىزگەن ساياساتىنىڭ سالدارى. قازىر بۇل وقيعالار شەگىنە جەتىپ وتىر»، – دەدى لاۆروۆ.
ونىڭ ايتۋىنشا، ترامپ رەسەي كورسەتكەن العاشقى سەبەپتەردىڭ شىن مانىندە جويىلۋى قاجەت ەكەنىن تۇسىنگەن.
«بۇل – ۋكراينانىڭ ناتو-عا قوسىلۋىنا جول بەرمەۋ، سونداي-اق 2014 جىلعى توڭكەرىستەن كەيىن بيلىككە كەلگەن رەجيم اياققا تاپتاعان ازاماتتاردىڭ قۇقىقتارىن قالپىنا كەلتىرۋ ماسەلەلەرى. قازىر بۇل تاقىرىپتار بەلسەندى تالقىلانىپ جاتىر»، – دەدى ول.
لاۆروۆ سونىمەن بىرگە ترامپتىڭ ادام قۇقىقتارىن قورعاۋعا قاتىستى ۇستانىمىن ەرەكشە اتاپ ءوتتى. ونىڭ سوزىنشە، اقش-تىڭ ارنايى وكىلى ستيۆەن ۋيتكوفف جەتكىزگەن ۇسىنىستاردا ۋكراينا اۋماعىندا قالعان حالىقتىڭ ۇلتتىق ازشىلىق قۇقىقتارى مەن ءدىني بوستاندىقتارىن حالىقارالىق نورمالارعا ساي قامتاماسىز ەتۋ قاجەتتىگى كورسەتىلگەن.
