The New York Times (NYT) 4 جەلتوقسان كۇنى اقش-تىڭ سوعىس مينيسترلىگىنە (پەنتاگونعا) قارسى ۆاشينگتوننىڭ وكرۋگتىك سوتىنا تالاپ-ارىز بەردى. گازەت ۆەدومستۆو ەنگىزگەن جۋرناليستەرگە ارنالعان جاڭا ەرەجەلەر ءبىرىنشى تۇزەتۋدى، ياعني ءباسپاسوز ەركىندىگىن كەپىل ەتەتىن كونستيتۋتسيالىق نورمانى بۇزادى دەپ ەسەپتەيدى. بۇل تۋرالى باسىلىم تالاپ-ارىز تۇسىرىلۋىنە بىرنەشە ساعات قالعاندا جاريالادى، دەپ حابارلايدى "ادىرنا".
NYT-ءتىڭ جازۋىنشا، قازان ايىنان باستاپ كۇشىنە ەنگەن ىشكى رەگلامەنت جۋرناليستەردەن 21 بەتتىك قۇجاتقا قول قويۋدى تالاپ ەتەدى. وندا:
-
اقپارات كوزدەرىمەن بايلانىسقا شەكتەۋ;
-
اقپارات سۇراۋعا بايلانىستى جاڭا تالاپتار سياقتى شەكتەۋلەر بار.
گازەت بۇل نورمالار پەنتاگوننىڭ بۇرىن ءباسپاسوز ءۇشىن اشىق بولعان سالالاردى جابۋ ارەكەتى دەپ سانايدى. باسىلىمنىڭ پىكىرىنشە، ۆەدومستۆو جۋرناليستەرگە «مينيسترلىك پەن باسشىلىقتىڭ ءىس-ارەكەتتەرىن باتىل ءارى تاۋەلسىز زەرتتەپ، جاريالاۋعا» كەدەرگى جاساۋعا تىرىسادى.
گازەت سوتتان پەنتاگوننىڭ جاڭا ەرەجەلەرىن باسپاسوزگە قولدانۋعا تىيىم سالۋدى، سونداي-اق ءبىرىنشى تۇزەتۋدى بۇزاتىن نورمالاردى زاڭسىز دەپ تانۋدى سۇرايدى.
باسىلىمنىڭ پىكىرىنشە، بۇل تالاپ جۋرناليستيكانىڭ «زاڭدى ءارى قالىپتى اقپارات جيناۋ ادىستەرىن» مۇمكىن ەمەس ەتەدى.
پەنتاگون قازان ايىندا جاڭا ەرەجەلەردى «نىسانعا قول جەتكىزۋ – بۇل رەتتەلۋى ءتيىس ارتىقشىلىق»دەپ ءتۇسىندىردى.
ۆەدومستۆو نورمالار ۇلتتىق قاۋىپسىزدىككە نۇقسان كەلتىرەتىن اقپاراتتىڭ تارالۋىن بولدىرماۋ ءۇشىن ەنگىزىلگەنىن مالىمدەدى.
NYT-ءتىڭ مالىمەتىنشە، ونداعان جۋرناليست جاڭا ەرەجەلەردەن باس تارتىپ، وزىنە بەرىلگەن رۇقسات قاعازدارىن قايتارىپ بەرگەن.
بىرقاتار ءىرى مەديا ۇيىمدار پەنتاگوندى اشىق سىنعا الدى.
«بۇل ساياساتتىڭ بالاماسى جوق جانە جۋرناليستەردىڭ نەگىزگى قورعانىس مەحانيزمدەرىنە قاۋىپ توندىرەدى»، دەلىنگەن ABC News, CBS News, CNN, Fox News جانە NBC News مالىمدەمەسىندە.
NYT اتاپ وتكەندەي، جۋرناليستەرگە قاتىستى شەكتەۋلەر اقپان ايىنان بەرى كۇشەيىپ كەلەدى.
قاڭتاردىڭ سوڭىندا قىزمەتىنە كىرىسكەن مينيستر پيت حەگسەتت NYT جانە باسقا بىرنەشە مەديا ۇيىمدى پەنتاگونداعى ارنايى بيۋرولارىنان ايىرعان. ولاردىڭ ورنىنا كونسەرۆاتيۆتى مەديا – Newsmax, Breitbart News جانە باسقالارى ورنالاستىرىلعان.
مامىر ايىندا حەگسەتت جۋرناليستەردىڭ پەنتاگون عيماراتتارىنىڭ كوپ بولىگىندە ارنايى سۇيەمەلدەۋسىز جۇرە المايتىنىن بەلگىلەگەن بۇيرىق شىعاردى.
