Túrkmenabatta AQSh-taǵy týystaryna úılený toıyndaǵy sýretteri men beınejazbalaryn jibermekshi bolǵan jergilikti turǵyndar ustaldy, dep habarlaıdy «Adyrna» tilshisi.
27 jeltoqsanda eki kelinshek shetelde turatyn týystarymen sóılesip, úılený toıyndaǵy estelikterdi jiberý úshin ınternet-kafege kelgen.
Týystarymen áńgimelesý barysynda olarǵa polıııa qyzmetkerleri jolyǵyp, áıelderdi Gýrbansoltan-eje shaǵyn aýdanynda ornalasqan qalalyq polıııa bólimshesine jetkizken. Olardyń uıaly telefondary tekserilip, qysqa jaýap alýdan keıin 31 jeltoqsan kúni túske deıin ustaý kamerasyna qamalǵan. Polıııa AQSh-ta qandaı týystary turatynyn, olardan qalaı ketkenin, eger týystarymen sóılesip, toıdy kórgisi kelse, Túrikmenstanǵa nege kelmegenin suraǵan. Jyldyń sońǵy kúni ustalǵandardan jazbasha túsiniktemeler alynyp, bosatylǵanymen, 2-7 qańtar aralyǵynda qaıtadan jaýap alýǵa shaqyrylatyny eskertilgen. Alaıda áıelderdiń uıaly telefondary qaıtarylmaǵan.
Qańtardyń 5-i kúni jaýap alý kezinde áıelderdiń biri esinen tanyp, polıııa jedel járdem men jaýap alynǵandardyń ata-anasyn shaqyrýǵa májbúr bolǵan. Osy oqıǵadan keıin áıelder bosatylyp, olardyń týystaryna tergeý kezinde jınalǵan derekter bir jyl boıy saqtalatyny jáne osy ýaqyt ishinde kelinshekterdiń bireýi Túrikmenstannan tys jerde ornalasqan týystarymen nemese dostarymen baılanysqan jaǵdaıda qylmystyq is qozǵalatynyn jetkizgen.
Aıta keteıik, Túrikmenstan bıligi el turǵyndarynyń shetelde turatyn adamdarmen múmkindiginshe az baılanysta bolýyn jáne sheteldik aqparattyq basylymdarǵa foto jáne beıne materıaldardy jibermeýin qadaǵalaıdy.
