اتىراۋدا تسەرەبرالدى سال اۋرۋىنا شالدىققان 13 جاستاعى قىزدى زورلاماق بولعان ەر ادامعا قاتىستى سوت ۇكىمى شىقتى، دەپ حابارلايدى «ادىرنا» ءتىلشىسى.
وقيعا 2022 جىلدىڭ 6 جەلتوقسانىندا بولعان. بۇعان دەيىن ءجاسپوسپىرىمنىڭ اناسى قىزىن كولىكتە قالدىرىپ، ءوزى دۇكەنگە بىرنەشە مينۋتقا كىرىپ كەتكەنىن ايتقان ەدى. دۇكەننەن شىققاندا كولىگىن تاپپاي قالعان. پاترۋلدىك پوليتسيا باسقارماسىنىڭ قىزمەتكەرلەرى ۇرلانعان كولىكتى اتىراۋ قالاسىنداعى «اۆانگارد» شاعىناۋدانىنان تاپقان. كولىكتى 1988 جىلعى ەر ادام ۇرلاپ اكەتكەن.
پوليتسەيلەر كولىكتىڭ جۇك سالعىش بولىگىنەن كۇدىكتىنى ۇستادى. ماماندار ەر ادامنىڭ ۇستىندە كيىمى بولماعانىن مالىمدەدى. ال كولىك سالونىندا 13 جاستاعى ءجاسوسپىرىم بولعانى انىقتالدى.
2023 جىلدىڭ ماۋسىم ايىندا اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ەر ادامعا ۇكىم شىعاردى. ول زورلاۋ ارەكەتى جانە اۆتوكولىكتى ايداپ اكەتۋ بويىنشا كىنالى دەپ تانىلدى.
وبلىستىق سوتتىڭ ءباسپاسوز قىزمەتى بۇل ءىستىڭ جابىق سوت وتىرىسىندا قارالعانىن اتاپ ءوتتى. سوندىقتان ءىستىڭ ءمان-جايى جاريا ەتىلمەدى.
«سوتتالۋشىنىڭ كىناسى كامەلەتكە تولماعان جابىرلەنۋشىنىڭ جانە ونىڭ زاڭدى وكىلىنىڭ، كۋاگەرلەردىڭ ايعاقتارىمەن، وقيعا بولعان جەردى تەكسەرۋ حاتتاماسىمەن، ساراپتاما قورىتىندىلارىمەن تولىق دالەلدەندى.
ايىپتالۋشى ءوزى كىناسىن مويىندادى. سوت ۇكىمىمەن ەر ادام 17 جىلعا باس بوستاندىعىنان ايىرۋ جازاسى تاعايىندالدى. سوت ۇكىمى زاڭدى كۇشىنە ەندى»،—دەلىنگەن حابارلامادا.
