«استراحان-اتىراۋ» پويىزىنىڭ جولسەرىكتەرى تولعاعى باستالعان جولاۋشىنى بوساندىرىپ الدى. بۇل تۋرالى «قازاقستان تەمىر جولى» ۇلتتىق كومپانياسىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
جاعداي «اققىستاۋ-اتىراۋ» ارالىعىندا «استراحان-اتىراۋ» قاتىناسىنداعى №626 جولاۋشىلار پويىزىندا بولعان.
كەنجەگۇل قايىربولاتوۆا گانيۋشكينودان اتىراۋعا بەسىنشى ۆاگونمەن كەلە جاتقان. قۇرام گانيۋشكينو ستانتسياسىنان جونەلتىلگەننەن كەيىن كەنجەگۇلدە تاڭعى ساعات 5-تە تولعاق باستالدى. قۇرام باستىعى ساۋلە ءىلياسوۆا باستاعان پويىز بريگاداسىنىڭ قىزمەتكەرلەرى نۇسقاۋلىققا سايكەس ماشينيستكە حابارلاپ، جەدەل مەديتسينالىق جاردەم بريگاداسىن جاقىن ماڭداعى ستانتسياعا شاقىرتتى.
جەدەل جاردەم قىزمەتى كەلگەنگە دەيىن جولسەرىكتەر ساعات 05:30-دا ۆاگوندا قىز بوسانعان جاس اناعا قاجەتتى كومەك كورسەتتى.
ساۋلە ءىلياسوۆانىڭ ايتۋىنشا، جولاۋشىلار تاسىمالىندا جۇمىس ىستەگەن 15 جىل ىشىندە ول وسىنداي جاعدايعا العاش رەت تاپ بولعان.
«كومپانيامىزدا ستاندارتتى ەمەس جاعدايلاردا ارەكەت ەتۋگە ۇيرەتەدى جانە ءبىز ارقاشان جولاۋشىلارىمىزعا كومەك كورسەتۋگە دايىنبىز»، – دەدى ساۋلە ءىلياسوۆا.
اتىراۋ ستانتسياسىنا كەلگەننەن كەيىن جاڭا تۋعان ءسابيدى اناسىمەن بىرگە جەدەل جاردەم قىزمەتكەرلەرى قابىلداپ الدى.
”ادىرنا” ۇلتتىق پورتالى
