اتىراۋعا قاراستى اۋماقتا قامىس ءورتى سوندىرىلمەدى، دەپ حابارلايدى "ادىرنا" ۇلتتىق پورتالى.
ناقتىراق، ەركىنقالا اۋىلدىق وكرۋگىنەن كاسپي تەڭىزى باعىتىنا قاراي شامامەن 40 شاقىرىم جەردە ورنالاسقان يساتاي جانە ماحامبەت اۋداندارىنىڭ شەكاراسىنداعى جەتۋى قيىن باتپاقتى اۋماقتا بولعان قامىس ءورتى ءالى تولىق سوندىرىمەگەن.
ءوڭىردىڭ كوممۋنيكاتسيالار قىزمەتىنىڭ مالىمەتىنشە، 7 شىلدە ساعات 15:00-دەگى جاعداي بويىنشا الدىن الا ەسەپپەن ءورت 69 گەكتار اۋماقتى شارپىعان. ونىڭ 53 گەكتارى ءورت سوندىرۋشىلەردىڭ كۇشىمەن سوندىرىلسە، تاعى 11 گەكتارىندا جالىن وزدىگىنەن وشكەن. ال قازىر شامامەن 5 گەكتار اۋماق ورتەنىپ جاتىر.
ءورتتى ءسوندىرۋ جۇمىستارى باتپاقتى ءارى ارنايى تەحنيكانىڭ جۇرۋىنە قولايسىز جەردە جۇرگىزىلۋدە. وقيعا ورنىندا اتىراۋ وبلىستىق تجد 34 قىزمەتكەرى مەن 7 تەحنيكاسى، «اقجايىق» مەملەكەتتىك تابيعي رەزەرۆاتىنىڭ 10 قىزمەتكەرى مەن 5 تەحنيكاسى، سونداي-اق جەرگىلىكتى اتقارۋشى ورگاننىڭ 11 قىزمەتكەرى مەن 5 تەحنيكاسى جۇمىلدىرىلعان.
توتەنشە جاعدايلار دەپارتامەنتىنىڭ مالىمەتىنشە، قازىرگى ۋاقىتتا ەلدى مەكەندەرگە قاۋىپ جوق. ءورتتى تولىق ءسوندىرۋ جۇمىستارى جالعاسۋدا.
