الماتىلىق ارۋ زورلىق-زومبىلىق قۇربانى بولىپ، ادىلدىك ىزدەپ، اراشا سۇرايدى، - دەپ حابارلايدى “ادىرنا” ءتىلشىسى. SVET قوعامدىق قورىنىڭ Instagram جەلىسىندە زارداپ شەككەن قىزدىڭ ۆيدەو حابارلاماسى پايدا بولدى. ونىڭ ايتۋىنشا، وزىنە بەلگىسىز سەبەپتەرمەن زورلاۋ ىسىنە قاتىستى تەرگەۋ جۇمىستارى كەشىكتىرىلىپ جاتىر.
جابىرلەنۋشىنىڭ ەسىمى ەلينا، ول 22 جاستا. ونى ءبىر تانىسى زورلاپ كەتكەن. ونىڭ ايتۋىنشا، ول 2023 جىلدىڭ 9 ناۋرىزىنا قاراعان ءتۇنى دوستارىمەن باردا دەمالىپ وتىرىپ، الگى تانىسىن كەزدەستىرىپ قالعان.
«الىس ءبىر تانىسىم قاسىما كەلىپ، بىرنەشە رەت اڭگىمە قوزعاماق بولىپ، الكوگولدىك كوكتەيلمەن سىيلاعانداي بولدى دا، سودان كەيىن مەن ءوزىمدى قاتتى ماس سەزىندىم. قۇربىم ەكەۋمىز ۇيگە قايتۋعا دايىندالىپ جاتقاندا، كۇدىكتى جەتكىزىپ تاستاۋعا ۇسىنىس جاسادى. جولدى ءۇش مەكەن-جايعا ءبولىپ تاكسي شاقىرتتى جانە مەنىڭ ماس ءارى دارمەنسىز كۇيدە قالعانىمدى پايدالانىپ، ماعان بىلدىرمەي تاكسيدىڭ مەكەن-جايىن اۋىستىرىپ ءوز ۇيىنە اكەتىپ قالعان»، - دەيدى بويجەتكەن ءوزىنىڭ ۆيدەو حابارلاماسىندا.
زورلاۋ ءىسى كۇدىكتىنىڭ پاتەرىندە بولعان.
«مەن ەس-ءتۇسسىز كۇيدە بولدىم، بىراق مەن اراسىندا ەس جيىپ، قارسىلىق كورسەتۋگە تىرىستىم، بىراق ناتيجە بولمادى. كەلەسى كۇنى تاڭەرتەڭ وياندىم. بەيتانىس جابىق پاتەر، جالعىز ءوزىم عانا. ءبىراز ۋاقىتتان كەيىن مەن قۇربىلارىما حابارلاستىم، ولار مەنى تەزىرەك ول جەردەن شىعارۋعا تىرىستى»، - دەپ ەسكە الادى ەلينا.
بويجەتكەن قۇقىق قورعاۋ ورگاندارىنا حابارلاسقان. ول ارىز جازىپ، قىلمىستىق ءىس قوزعالدى. 288 كۇندىك تەرگەۋدەن كەيىن پوليتسيا ءىستى پروكۋراتۋراعا جىبەردى.
«الايدا پروكۋرور سول ءتۇنى مەنى ايداعان تاكسي جۇرگىزۋشىلەرىنەن جاۋاپ الۋ ءۇشىن ءىستى قوسىمشا تەرگەۋگە جىبەرۋدى ۇيعاردى. ياعني، 288 كۇننەن كەيىن ولار كۇن سايىن كوپ ادام تاسىمالدايتىن تاكسي جۇرگىزۋشىلەرىنەن جاۋاپ العىسى كەلەدى. تىكەلەي ايعاقتاردىڭ بولۋىنا قاراماستان، ياعني ەكى رەت سوت مەديتسينالىق ساراپتاماسىنىڭ قورىتىندىسى بويىنشا: ساننىڭ ىشكى بولىگىندە جانە دەنەدەگى قارسىلىق تانىتۋ كەزىندە پايدا بولعان كوگەرگەن ىزدەر مەن ءىش كيىمدەگى كۇدىكتىنىڭ ۇرىعى. سوعان سايكەس، وسىنىڭ بارلىعىنان كەيىن مەندە بىرقاتار سۇراقتار تۋىندايدى: پروكۋراتۋرا قانداي ماقساتپەن ءىستى سوتقا جىبەرمەيدى؟ بارلىق قاجەتتى تىكەلەي دالەلدەر بار بولسا، ونى قوسىمشا تەرگەۋگە جىبەرۋ كەرەك پە؟» – دەيدى جابىرلەنۋشى.
"زورلىق-زومبىلىق بولعاننان بەرى 310 كۇن ءوتتى. مەن بارلىق تىكەلەي دالەلدەرگە يە بولا وتىرىپ، ءىستى سوتقا جىبەرۋدى تالاپ ەتەمىن. مەن ادىلەتتىلىكتى تالاپ ەتەمىن. مەن زورلىق-زومبىلىقتان امان قالعان ءاربىر ايەل قورعالاتىنىن دالەلدەگىم كەلەدى»، - دەپ تۇيىندەدى ەلينا.
الماتى قالالىق ءىىد بۇل دەرەك بويىنشا مەدەۋ اۋداندىق پوليتسيا ءبولىمى سوتقا دەيىنگى تەرگەۋ جۇرگىزىپ جاتقانىن حابارلادى.
«ءىس جۇرگىزۋ اياسىندا قاجەتتى ساراپتامالار تاعايىندالدى، قازىرگى ۋاقىتتا قىلمىستىق ءىس بويىنشا ءىستىڭ وبەكتيۆتى ءمان-جايلارىن انىقتاۋعا باعىتتالعان جەدەل-ىزدەستىرۋ شارالارى جۇرگىزىلۋدە»، - دەپ حابارلادى قالالىق پوليتسيا دەپارتامەنتىنىڭ ءباسپاسوز قىزمەتى.
