تالدىقورعاندا ءتورت پوليتسيا قىزمەتكەرى قاڭتار وقيعاسى كەزىندەگى ازاپتاۋ ءىسى بويىنشا كىنالى دەپ تانىلدى، دەپ حابارلايدى "ادىرنا" ۇلتتىق پورتالى جەتىسۋ وبلىستىق پروكۋراتۋراسىنىڭ ءباسپاسوز قىزمەتىنە سىلتەپ.
ناۋرىزدىڭ 18-ءى كۇنى تالدىقورعان سوتى بۇرىنعى ءتورت پوليتسيا قىزمەتكەرىنە قاڭتار وقيعاسى كەزىندە ازاپتاۋ فاكتىسى بويىنشا (قر قىلمىستىق كودەكسىنىڭ 146-بابى) قاتىستى ۇكىمى شىقتى. قىلمىستىق ءىستى جەتىسۋ وبلىسىنىڭ ارنايى پروكۋرورلارى تەرگەگەن.
«مەملەكەتتىك پروكۋرورلار 2022 جىلدىڭ 5 قاڭتارى مەن 16 قاڭتارى ارالىعىندا الماتى وبلىسى ءىىد عيماراتىندا قىلمىسكەرلەردىڭ «فيزيكالىق كۇش كورسەتۋمەن قوسا تىيىم سالىنعان تەرگەۋ ادىستەرىن» جاساعانىن دالەلدەدى. زاڭسىز ارەكەتتەردىڭ سالدارىنان جەتى جابىرلەنۋشىنىڭ دەنساۋلىعىنا ءارتۇرلى دارەجەدەگى جاراقاتتار كەلتىرىلگەن»، دەلىنگەن جەتىسۋ وبلىستىق پروكۋراتۋراسىنىڭ رەسمي سايتىنداعى حابارلامادا.
سوت ۇكىمىمەن ءۇش سوتتالۋشى 4 جىلدان 6 جىلعا دەيىنگى باس بوستاندىعىنان ايىرۋدىڭ ءارتۇرلى مەرزىمدەرىنە سوتتالىپ، ولاردىڭ بىرەۋى باس بوستاندىعىنان ايىرۋعا بايلانىستى ەمەس جازاعا تارتىلعان. سونداي-اق سوت ولاردى شەندەرىنەن جانە مەملەكەتتىك قىزمەتتە جۇمىس ىستەۋ قۇقىعىنان ايىردى.
