الماتى وبلىسىنىڭ پروكۋراتۋراسى تالعار اۋدانىندا ەر ادامدى ءولتىرۋ جانە كىشكەنتاي قىزدى ۇرلاۋ ىسىنە بايلانىستى پوليتسيا قىزمەتكەرلەرىنىڭ ارەكەتسىزدىگى فاكتىسى بويىنشا قىلمىستىق ءىس قوزعادى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
«6 قىركۇيەكتە الماتى وبلىسىنىڭ پروكۋراتۋراسى قر قك-ءنىڭ 370-بابىنىڭ 4-بولىگى (لاۋازىمدى تۇلعانىڭ ارەكەتسىزدىگى) بويىنشا قىلمىستىق ءىس تىركەدى. ءىس تالعار اۋداندىق پوليتسيا باسقارماسى قىزمەتكەرلەرىنىڭ كۇدىكتىنى دەر كەزىندە ۇستاۋ بويىنشا شارا قولدانباۋىمەن بايلانىستى. ول كەيىننەن ەر ادامدى ءولتىرىپ، كامەلەتكە تولماعان قىزدى ۇرلاپ كەتكەن»، – دەلىنگەن رەسمي حابارلامادا.
قازىرگى تاڭدا ءىستى ارنايى پروكۋرورلار وندىرىسكە الدى. الماتى وبلىستىق پروكۋراتۋراسى تەرگەۋ بارىسى ەرەكشە باقىلاۋدا ەكەنىن اتاپ ءوتتى.
سونىمەن بىرگە، ۆەدومستۆو قوعامدى تەك رەسمي دەرەككوزگە سەنۋگە شاقىرىپ، جالعان اقپارات تاراتقاندار زاڭ الدىندا جاۋاپكەرشىلىككە تارتىلاتىنىن ەسكەرتتى.
