مادەنيەت جانە اقپارات ءمينيسترى ايدا بالاەۆا ەلىمىزدە شىعارماشىلىق سۋبەكتىلەردىڭ بىرقاتار سالىق تولەۋدەن بوساتىلاتىنىن مالىمدەدى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، شىعارماشىلىق سۋبەكتىلەرىنە سالىقتى جەڭىلدەتۋ ماقساتىندا ۇكىمەت قاۋلى قابىلداعان.
«مەملەكەت باسشىسىنىڭ شىعارماشىلىق يندۋستريانى دامىتۋ جونىندەگى تاپسىرماسىن ورىنداۋ ءۇشىن ۇلىتتىق ەكونوميكا جانە قارجى مينيسترلىكتەرىمەن بىرگە كەشەندى جۇمىس جۇرگىزدىك.
مۇنداعى ماقساتىمىز شىعارماشىلىق سۋبەكتىلەرىنە سالىقتى جەڭىلدەتۋ بولدى. وسى كەشەندى جۇمىستىڭ ناتيجەسىندە ۇكىمەت قاۋلى قابىلدادى. قاۋلىعا سايكەس، 40 قىزمەت ءتۇرى ارنايى بولشەك سالىق رەجيمىنە ءوتتى. بۇل دەگەنىمىز – بيزنەستىڭ كتس، جەكە تابىس سالىعى، ققس تولەۋدەن بوساتىلعانىن بىلدىرەدى. اتالعان قىزمەت تۇرلەرىمەن اينالىساتىن سۋبەكتىلەر ەندى بىرىڭعاي سالىقتى عانا تولەيدى. بۇل جەكە كاسىپكەرلەر ءۇشىن 2%-دان 4%-عا دەيىن، جشس ءۇشىن 8%-عا دەيىن بولادى. تەك كومپانيانىڭ جىلدىق اينالىمى 2,2 ميلليارد تەڭگەدەن اسپاۋعا، ال شتاتتا 200 ادامنان كوپ بولماۋعا ءتيىس، - دەپ جازدى مينيستر Facebook-تەگى پاراقشاسىندا.
سونداي-اق، ول سالىقتى جەڭىلدەتۋ كينو، بەينەكونتەنت پەن تەلەباعدارلامالاردى وندىرۋگە جانە كەيىنگى وندىرىسكە، مۋزىكالىق شىعارمالارعا دىبىس جازۋ مەن باسىپ شىعارۋعا، تەاتر جانە مۋزەي ونەرىنە، ساۋلەت جانە ديزاينعا، قولونەر بۇيىمدارىنا، حالىق شىعارماشىلىعىنا جانە كادەسىيلار وندىرىسىنە اسەر ەتەتىنىن دە ايتتى.
«وسى قولداۋ شاراسىن ازىرلەۋ بارىسىندا حالىقارالىق تاجىريبەنى مۇقيات تالدادىق. ەڭ وزىق ەلدەردىڭ (ۇلىبريتانيا، گەرمانيا، وڭتۇستىك كورەيا) تاجىريبەسى شىعارماشىلىق يندۋستريانى دامىتۋ ءۇشىن سالىقتى جەڭىلدەتۋگە ەرەكشە ءمان بەرۋ كەرەكتىگىن كورسەتەدى. اتالعان جۇمىس – سالانى اۋقىمدى دامىتۋعا باعىتتالعان العاشقى قادامداردىڭ ءبىرى. بۇل – ۇزاق جولدىڭ باسى عانا»، - دەدى ايدا بالاەۆا.
