ەسكى كولىكتەرگە سالىناتىن سالىقتى ازايتۋ ماسەلەسى قاراستىرىلۋدا. ۇكىمەت قىركۇيەك ايىنىڭ ورتاسىندا جاڭا سالىق كودەكسىنىڭ جوباسىن ءماجىلىستىڭ قاراۋىنا بەردى، دەپ حابارلايدى “ادىرنا” ۇلتتىق پورتالى inbusiness.kz سايتىنا سىلتەپ.
اقپاراتقا سايكەس، جاڭا سالىق كودەكسىندە ەسكى كولىكتەرگە قاتىستى بىرقاتار جاڭاشىلدىق بار. اتاپ ايتقاندا، قولدانۋى 10 جىلدان اسقان اۆتوموبيلدەرگە سالىناتىن سالىق مولشەرى 30%-عا، ال 20 جىلدان اسقان كولىكتەر ءۇشىن 50 پايىزعا تومەندەتىلمەك. اتقارۋشى بيلىك ۇسىنىپ وتىرعان بۇل وزگەرىستەر دەپۋتاتتار اراسىندا قىزۋ تالقىعا ءتۇستى.
"ەسكى كولىك بولسا، وعان سالىقتى ازايتامىز دەيدى. ۋتيل الىم ماسەلەسى بولعاندا بىزگە جەڭىل كولىكتەر جاڭا بولعانى جاقسى دەپ ايتتى. بۇل ارگۋمەنت تۇسىنىكتى. ەندى ماشينا ەسكى بولاتىن بولسا، سالىقتى ازايتامىز دەيدى. ونىڭ ءبىر-بىرىمەن لوگيكاسى قانداي؟", - دەدى ءماجىلىس دەپۋتاتى اسحات ايماعامبەتوۆ.
قارجى ۆيتسە-ءمينيسترى ەرجان ءبىرجانوۆ اۋىلداردا جۇزدەگەن مىڭ ەسكى كولىك بارىن جەتكىزدى. ايتۋىنشا، ەلدىمەكەندەردە "جيگۋلي" مەن "موسكۆيچتەر" ءالى كۇنگە دەيىن ءجۇر.
ء"بىز ەسكى كولىكتەر بويىنشا تومەندەتىلگەن سالىق سالامىز. كوبى سىنىپ تۇر، بىراق تىركەۋدەن الىنعان جوق. ىستەمەيتىن كولىككە جىل سايىن (سالىققا) ون مىڭنان كەلىپ تۇرسا، اۋىرتپاشىلىق تيەدى. بۇل اۋىل تۇرعىندارىنىڭ ءوتىنىشى بولدى. وڭىرلەردە جۇرگەن كەزدە وسىنداي ۇسىنىستار تۇسكەن", - دەدى ۆيتسە-مينيستر.
اۆتوساراپشى الەكسەي الەكسەەۆ ءتيىستى جاڭاشىلدىققا قاتىستى پىكىرىن ءبىلدىردى.
"ونىڭ ورنىنا قوزعالتقىشى ۇلكەن ەسكى كولىكتەر ءۇشىن سالىقتى وڭتايلاندىرۋدى ۇسىنار ەدىم. ماسەلەن، بىزدە قوزعالتقىش كولەمى 4 ليتردەن اساتىن ەسكى كولىكتەر جەتەرلىك، ولاردىڭ سالىعى وتە جوعارى. زاڭدا وسىنداي قيسىنسىز دۇنيە بار. قولدانۋى 20, 30 جىلدان اسقان ۇلكەن قوزعالتقىشى بار كولىكتەردە قالىپتى سالىق بولۋى كەرەك. سەبەبى ماقسات ۇلكەن قوزعالتقىشتارعا سالىق سالۋ بولدى، زاڭ قابىلدانعان كەزدە ۇلكەن قوزعالتقىشى بار كولىكتەردىڭ دەنى پرەميۋم ساناتتاعى، ياعني قىمبات كولىكتەر بولاتىن. ولارعا جوعارى سالىق سالۋ اقىلعا قونىمدى ەدى. بىراق ەسكى ماشينالار دا وسى ماسەلەگە تاپ بولدى", - دەدى ساراپشى.
سوزىنشە، ەسكى كولىكتەرگە سالىناتىن سالىقتى ازايتۋعا قاتىستى وزگەرىستەرگە حالىق العىسىن ايتۋى مۇمكىن.
"مەنىڭشە، تەك قازىناعا از تۇسەتىنى بولماسا، ول ەشنارسەگە اسەر ەتپەيدى. ەگەر دە كولىكتەگى قوزعالتقىش كولەمى 2 ليترگە جۋىق بولسا، وندا سالىقتىڭ تومەندەۋىنىڭ قاتتى اسەرى بولمايدى. وسىعان دەيىن جىلىنا 10 مىڭ تولەپ كەلگەن ادام ەندى 5 مىڭ تولەيتىن بولادى دەگەندەي. قوزعالتقىش كولەمى ۇلكەن ەسكى ماشينالارعا سالىقتى ازايتۋ كەرەك، سوندا قيسىندى بولار ەدى", - دەدى الەكسەي الەكسەەۆ.
اتاپ كەتەيىك، ەسكى كولىكتەر ءۇشىن كولىك سالىعىن ازايتۋ تۋرالى ۇسىنىستار جاڭا سالىق كودەكسىندە ايقىندالعان.
