پرەمەر-ءمينيستردىڭ ورىنباسارى - مادەنيەت جانە اقپارات ءمينيسترى ايدا بالاەۆا سايلاۋالدى ناۋقان كەزىندە جۋرناليستەر مەن بلوگەرلەردىڭ قىزمەتىنە قاتىستى پىكىر ءبىلدىرىپ، ولاردىڭ زاڭ اياسىندا ەركىن جۇمىس ىستەۋگە قۇقىعى بار ەكەنىن ايتتى، دەپ حابارلايدى «ادىرنا» ءتىلشىسى.
ءمينيستردىڭ سوزىنشە، قازاقستان زاڭناماسىنا سايكەس جۋرناليستەر كاسىبي قىزمەتى بارىسىندا فوتو، اۋديو جانە بەينەتۇسىرىلىم جۇرگىزىپ، اقپارات تاراتا الادى.
«ەڭ الدىمەن، جۋرناليستەر مەن بلوگەرلەردىڭ زاڭ شەڭبەرىندە ءوز قىزمەتىن ەركىن جۇزەگە اسىرۋعا، سونىڭ ىشىندە فوتو جانە بەينەتۇسىرىلىم جۇرگىزۋگە قۇقىعى بار ەكەنىن اتاپ وتكىم كەلەدى. قازاقستان رەسپۋبليكاسىنىڭ «ماسس-مەديا تۋرالى» زاڭىنا سايكەس جۋرناليستەر كاسىبي قىزمەتى بارىسىندا فوتوعا، اۋديوعا جانە بەينەگە تۇسىرۋگە، سونداي-اق اقپارات تاراتۋعا قۇقىلى»، – دەدى ايدا بالاەۆا.
ول سونداي-اق بىرقاتار بۇقارالىق اقپارات قۇرالدارى مەن بلوگەرلەردىڭ الەۋمەتتىك جەلىدەگى پاراقشالارىنىڭ بۇعاتتالۋىنا قاتىستى پىكىر ءبىلدىردى.
«جۋرناليستەر مەن بلوگەرلەردىڭ كاسىبي قىزمەتىنە نەمەسە ءسوز بوستاندىعىنا نەگىزسىز شەكتەۋ قويىلدى دەگەن پىكىر تۋعىزاتىن كەز كەلگەن ارەكەت تەك جەكەلەگەن جۋرناليستەر مەن بلوگەرلەرگە عانا ەمەس، مەملەكەتتىك ورگانداردىڭ بەدەلىنە دە نۇقسان كەلتىرەدى. بۇل ماسەلە سايلاۋ ناۋقانى كەزىندە ايرىقشا ماڭىزدى. مادەنيەت جانە اقپارات مينيسترلىگى الەۋمەتتىك جەلى قولدانۋشىلارىنىڭ، ونىڭ ىشىندە بۇقارالىق اقپارات قۇرالدارى مەن جۋرناليستەردىڭ اككاۋنتتارىن بۇعاتتامايدى. مەملەكەت تە مۇنداي ارەكەتتەرگە نەمەسە ءسوز بەن پىكىر ەركىندىگىن شەكتەۋگە مۇددەلى ەمەس. كەرىسىنشە، مۇنداي ارەكەتتەر مەملەكەت پەن ونىڭ ينستيتۋتتارىنىڭ بەدەلىنە نۇقسان كەلتىرىپ، ولاردى قوعام الدىندا تەرىس كورسەتۋگە پايدالانىلۋى مۇمكىن»، – دەدى مينيستر.
ول الەۋمەتتىك جەلىلەر مەن ونلاين-پلاتفورمالار اكىمشىلىكتەرىن زاڭعا قايشى كونتەنتتى ۋاقىتىلى انىقتاپ، جويۋ جۇمىستارىن كۇشەيتۋگە شاقىردى. سونىمەن بىرگە زاڭسىز كونتەنتپەن كۇرەس ءسوز بوستاندىعىن نەگىزسىز شەكتەۋگە ۇلاسپاۋى ءتيىس ەكەنىن ەسكەرتتى.
