2025 جىلى رەسپۋبليكالىق بيۋدجەتكە 730 ملرد تەڭگە كولەمىندە سالىق تولىعىمەن تۇسپەگەن. بۇل تۋرالى جوعارى اۋديتورلىق پالاتانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
پالاتا مۇنىڭ نەگىزگى سەبەپتەرىنىڭ ءبىرى رەتىندە سالىق تۇسىمدەرى بويىنشا بولجامنىڭ 1,3 ترلن تەڭگەگە ارتىق جوسپارلانعانىن اتادى.
«مەملەكەتتىك اۋديتورلاردىڭ انىقتاۋىنشا، ەسەپتى كەزەڭدە رەسپۋبليكالىق بيۋدجەتكە تۇسەتىن سالىقتىق تۇسىمدەر جوسپارى تولىق ورىندالماعان. تۇسپەگەن سوما 730 ملرد تەڭگە نەمەسە 4,8%. نەگىزگى سەبەپتەردىڭ ءبىرى – سالىق بويىنشا بولجام 1,3 ترلن تەڭگەگە ارتىق جوسپارلانعان. اۋديت ناتيجەسىندە سوڭعى ءتورت جىلدا قوسىمشا ەسەپتەلگەن سالىق سومالارى بويىنشا داۋلانعان ىستەردىڭ جارتىسىنان استامى سالىق تولەۋشىلەردىڭ پايداسىنا شەشىلگەنى انىقتالدى. بۇعان سالىق زاڭناماسىنىڭ تالاپتارىن بۇزۋ جانە سالىقتىق تەكسەرۋ اكتىلەرىن جاساۋ كەزىندە جىبەرىلگەن راسىمدىك قاتەلىكتەر سەبەپ بولعان. وسىعان بايلانىستى جوعارى اۋديتورلىق پالاتا سالىقتىق تەكسەرۋلەر جۇرگىزۋ ساپاسىن باقىلاۋدى كۇشەيتۋ قاجەت دەپ ەسەپتەيدى»،– دەلىنگەن حابارلامادا.
كەدەندىك باقىلاۋ سالاسىندا دا بىرقاتار زاڭبۇزۋشىلىق انىقتالعان. اتاپ ايتقاندا، تەك ەلەكتر كولىكتەرىنە ارنالعان جەڭىلدىكتەردىڭ گيبريدتى اۆتوكولىكتەرگە دە قولدانىلعانى بەلگىلى بولعان. سونىڭ سالدارىنان بيۋدجەتكە كەمىندە 70 ملن تەڭگە كولەمىندە قاراجات تۇسپەگەن.
سونداي-اق سىرتقى ەكونوميكالىق قىزمەتتىڭ 34 قاتىسۋشىسى يمپورت كەزىندە قوسىلعان قۇن سالىعىن (ققس) ەسەپكە جاتقىزۋ ءادىسىن زاڭسىز پايدالانعان. ناتيجەسىندە بيۋدجەتكە يمپورتتىق ققس بويىنشا 670 ملن تەڭگەدەن استام قاراجات تۇسپەي قالعان.
بۇدان بولەك، اۋديت كەدەندىك راسىمدەردى جەڭىلدەتۋ قۇقىعىنا يە ۋاكىلەتتى ەكونوميكالىق وپەراتورلاردىڭ قىزمەتىنە باقىلاۋدىڭ جەتكىلىكسىز ەكەنىن كورسەتكەن. كەيبىر كومپانيالار مارتەبەسىن توقتاتۋعا نەگىز بولعانىنا قاراماستان، جەڭىلدىكتەردى پايدالانۋدى جالعاستىرعان.
اۋديت ناتيجەسىندە جالپى سوماسى 2,7 ملرد تەڭگەنى قۇرايتىن قارجىلىق زاڭبۇزۋشىلىقتار، 33 راسىمدىك بۇزۋشىلىق جانە 11 جۇيەلى كەمشىلىك انىقتالعان. پالاتا بارلىق اۋديت نىساندارىنا مىندەتتى ورىندالۋعا ءتيىس نۇسقامالار مەن ۇسىنىمدار جولداپ، ولاردىڭ ورىندالۋىن باقىلاۋعا العانىن مالىمدەدى.
